Yn kynduh aireng nyngkong eh ka Mawlai SC pyrshah ïa ka Lamlynti FC ban knieh ïa ki 3 point

Shillong, Risaw 27 : Ka samoi ïalehkai phutbol ka Shillong Sports Association, ka khreh ba kan jam sa sha kawei pat ka lympung ïalehkai, ha kaba ki lahduh (champions) bad ki kynhun ba wan ba-ar (runners-up) jong baroh ki kyrdan ïakhun (division), kin khreh ba kin ïaknieh pat ban rah ïa kawei ka nam lahduh bad katta ka dei ka Champion Cup 2026, kaba la sdang ban pynïalehkai nyngkong ïa ka naduh u snem ba la dep.
Haba ïadei bad kane, na ka liang ka SSA, ka la pynlong ïa ka jingïalang ban pyllait paidbah ïa ka trophy jong kane ka lympung, ha ka jingïalang ba la long ha conference room, ka SSA Stadium, First Ground, Polo.
Dei lyngba kane ka jingialang ba ka SSA ka la shim ïa ka bynta ba kan ai khyndiat ïa ki jingbatai kaei kaba ki klob ki donkam ba kin leh bad ban bud ïa ki kyndon kumba la dep ban pruid dak khamtam eh ïa ka jingpynbna ïa ka jingpynïakap ïa ki 10 tylli ki team ha ki artylli ki thup kata ha ka Group A & B.
Kat kumba la pynbna mynta ka sngi ha ka jingïalang ha ka Group A ki team/klob ba don ha kane ka thup ka kynthup ïa ka lahduh ka lympung Shillong Premier League ka Mawlai SC, bud sa ka Nongkrem kaba wan ba-ar na ka First Division, Mawpat SC kaba dei ka lahduh ka Second Division, Lam Lynti Football Club kaba wan ba-ar na ka lympung ïalehkai ka Third Division bad ka Mawpdang Sports Club ka lahduh jong ka Fourth Division.
Ha ka Group B ki team/klob ba la pynïakap ha ka ki long ka Shillong Lajong FC kaba wan ba-ar ha ka Shillong Premier League, Mawkhar Sports Club ba dei ka lahduh jong ka First Division, Sohryngkham Sports Club ba wan ba-ar ha ka Second Division, Sanmer Sports Club ka lahduh jong ka Third Division, Sei-La-Sap SCC kaba wan ba-ar ha ka lympung ïalehkai ka Fourth Division.
Hadien ba la dep pynïakap, la buh ryntih pat ïa baroh ki prokram ïalehkai, ha kaba ka jingïakhun sdang jong kane ka lympung mynta ka kynti kan long hapdeng ka Mawlai Sports Club pyrshah ïa ka Lamlynti FC, kaba la buh ban long ha ka 03 tarik u Naiwieng ban wan, ban long ha ka por 2:30 nohphai sngi ha SSA Stadium, Polo.
Ki klob/team kiba wan ba nyngkong bad ba ar na kine ki artylli ki thup (group) kin jam pat sha ka semifinal bad kiba jop na kine ki jingïakhun, kin jam sha ka phainal.
Napdeng ki 10 tylli ki team/klob, ban ïakhun mynta ka kynti ha kane ka lympung, ka Shillong Lajong FC kaba ïoh ïa ka kabu ba kan ïakhun arsien lynter, bad kane ka la wan ba kan bat ïa ka nam ba-ar ha ka lympung ïalehkai ka SPL ha ka samoi ïalehkai 2025 &2026 bad ba kan da wan ba-ar biang ruh ha kaba sdang jong kane ka lympung ka Champion Cup, hadien ba kan mad ïa ka namrem kaba long da 2-1 kol hakhmat ka kynhun ïalehkai ka Nongkseh SSCC.
Ha kane ka sngi la ïoh ruh ïa ka jingbatai kaba bniah na ka liang ki nongïalam jong ka Synjuk kynthup naduh u Secretary u Bah D.L Nongbri, Bah Freddy Kharpran Football Secretary bad kumjuh na u President ka SSA u Bah Banteidor Lyngdoh, MLA ha ryngkat ka jingïa don lang ki nongkit kam ka SSA, ki coach, manager bad ki captain jong ki 10 tylli ki team/klob kiban ïakhun ha kane ka lympung.