IWL -2 : Jakrem SC 3-2 Kemp FC : Khlem aili ki thei Jakrem ïa ki thei ka Kemp FC haduh ban da ïoh pynliem kylla haduh 3-2 kol

Shillong, Risaw 27 : Ka kynhun ïalehkai phutbol kynthei jong ka Jakrem Sports Club ka la bteng biang ban khur ïa ka nam jop hadien ba ka la lah ban pynliem noh haduh 3-2 kol ïa ka Kemp FC da 3-2 kol ha ka jingïakhun na ka Group C jong ka Lxme Indian Women’s League 2 (IWL-2) kaba long ha madan SSA Stadium, Polo, hynne ka sngi Ba-ar.
Ha kane ka jingïakhun kaba itynnad, ka Jakrem ka la pyni ïa ka mynsiem ïakhun kaba khlaiñ bha khamtam ban ïoh pynphai kylla bad pynkut syndon ïa ka jingïakhun da ka nam jop.
Haba phai sha ka jingïakhun, ka Kemp FC ka la sdang ïa ka jingïakhun ha ka rukom kaba itynnad bha hadien ba ka Puja Pachi ka la thep ïa ka kol ba nyngkong tang ha ka minit mar ïa sdang jong ka jingïakhun ban pynlong ïa ka kynhun jong ka ban lamkhmat da 1-0.
Ka nongap kol jong ka Jakrem, ka Banrisha Wahlang, ka la hap ban pyni ïa la ka jingtbit ha ka minit kaba 10, katba ka nongap kol jong ka Kemp FC, ka Aruni Singh, ka la khanglad ïa ka Jakrem ban pynïakhaid ha ka minit kaba 12.
Ka Jakrem ka la bteng ban pynjur ïa ka jingïalehkai bad ka la ïoh ban pynïakhaid ha ka minit kaba 20 lyngba ka free-kick kaba itynnad bha na ka Darishisha Kharlyngdoh, kaba la pynlong ïa ka jingïakhun ban poi sha ka jingïakhaid da 1-1 kol.
Tang san minit hadien kata, ka Marbarin Nongrum ka la thep ïa ka kol kaba ar jong ka Jakrem ha ka minit kaba 25, hadien ba ka jingpyrshang nyngkong jong ka Makrisha Songthiang ka la shah khanglad ha ka Aruni Singh.
Ka Kemp FC ka la bteng ban wad ïa ki lad ban thep kol biang, ha kaba ka Puja Pachi bad ka Serbirika Terangpi ki la ïoh ïa ki kabu kiba biang shuwa ban kut ka kylla step. Ka Jakrem ruh ka la hap ban ïalehkai bha ha kaba ka Rimika Khongkai ka la ïoh ban khanglad ïa ka kabu ksiar ha ka por pynjlan jong ka kylla step ban khanglad ïa ka Puja Pachi.
Ha ka kylla miet, ka Kemp FC ka la wanphai da ka jingthmu ban pynïakhaid bad ka la lah ban thep kol biang lyngba ka Aarushi Santosh ha ka minit kaba 56, ban pynlong ïa ka jingïakhun ban neh ha ka jingïakhaid da mar 2-2 kol.
Hynrei ka Jakrem kam shym la duh mynsiem. Ka Makrisha Songthiang, kaba la noh synñiang bha ha ka jingïalehkai shakhmat jong ka kynhun, ka la thep ïa ka kol kaba pynlong ïa ka Jakrem ban lamkhmat biang bad ban khur ïa ka jingjop da 3-2 kol.
Baroh ar tylli ki nongap kol ki la don bynta kaba khraw ha kane ka jingïakhun. Ka Banrisha Wahlang ka la pyni ïa ki jingsop kol kiba kongsan, katba ka Aruni Singh ka la khanglad ïa ka free-kick jong ka Darishisha ha ka minit kaba 75.
Watla ka Kemp FC ka la pyrshang ban pynïakhaid ha ki minit ba khatduh, hynrei ka Jakrem ka la ïada tyngeh haduh ban da kut ki phra minit ba la pynjlan, ban pynthikna ïa ka jingjop kaba 3-2 kol.
Kane ka jingjop ka long kawei pat ka jingjop kaba kongsan ïa ka Jakrem SC ha ka sien kaba nyngkong jong ka jingïashim bynta ha ka IWL-2, katba kane ka kynhun na Meghalaya ka dang bteng ïa ka jingïaid lynti jong ka ha ka lympung ïalehkai phutbol kynthei ha ka ri.
Ka Jakrem SC kan sa wanphai ban aireng biang ha ka 29 tarik mynta u bnai, ha kaba kan ïakhun pyrshah ïa ka Mumbai Knights FC ha ka por 2:30 baje nohphai sngi.