Ba jyllei u drok bad bun naki kam tuh kam thiem sha u DC pynsngew ka Synjuk ki Rangbah Shnong

Nongpoh, Naitung 15: Namar ka jingjyllei jong u drok bad ki kam tuh kam thiem ha kylleng ki shnong ha ka dong Ri-Bhoi kaba la wanrah ruh ka jingthud haka shong suk shongsaiñ bad ka jingshngaiñ jong ki paidbah, ka Synjuk ki Rangbah Shnong Ri-Bhoi District mynta ka sngi kala leit ban ïakynduh syndon ïa u Deputy Commissioner ka Ri-Bhoi District u A. Baranwal ban ïakren bad tai sani halor katei ka jingeh.

Ha katei ka jingleit kynduh naka liang ka Synjuk ki Rangbah Shnong hapoh ka jingïalam jong u Bah BB Makdoh kum u Chairman haka jingdonlang ki nongïalam ka synjuk bad ki Rangbah Shnong naki shnong bapher bapher kila ioh ruh ban pynpaw hakhmat u DC ka Ri-Bhoi ïa katei ka jingeh jong ki shnong bad ka jingshngaiñ haka imlang ka sahlang.

Haba kren sha ki lad pathai khubor naka liang u Bah BB Makdoh kum u Chairman u la pynpaw ba kum ki nongïalam shnong ki mad ki jingeh namar ka jingjur ki nongdih bad nongkhaii drok kaba la buh jingsyier ïaki paidbah haka imlang ka sahlang namar kitei ki nongkhaii drok bad ki nongdih drok kim salia ban leh kino kino ki kam sniew.

Na ka liang ki Rangbah Shnong kila pynpaw ruh hakhmat u DC ba dei ban shimkhia ban buh da ki jaka sumar bad syllok (Rehabilitation Centre) naka bynta ban pynkylla ïaka jingim jong ki samla kiba la ngop haki jingdih buaid, namar kumba long mynta bun naki samla kiba la ngop haki jingdih buaid kim ioh jaka ban sumar ne syllok nama don tang ki rehabilitation centre jong ki riew shimet ba ki longiing ba duk ba rangli kim kotbor ban phah sumar.

Shuh shuh naka liang ki Rangbah Shnong kila ioh ruh ban pynsngew hakhmat u DC halor ka lyer ILP bad MRSSA ba ki khun samla kila leh la ka jong ka kamram bad halor katei ka bynta donkam ruh ka jingïatreilang jong ki bor district bad kumjuh ruh ki bor shnong ban ithuh ïaki briew kiba pher kiba dang wan thymmai bad ki briew bala sah slem haki shnong bad kane kan ïada naka jingrung kyrthep ki mynder.