Shillong, Naitung 15: Ki Pulit ka East Jaiñtia Hills, ki la ïoh kem biang sa arngut ki briew kiba suba donkti ha ka jingpynïap tohmet ïa ki 4 ngut ki briew ha ka shnong Umpleng, East Jaiñtia Hills District.
Kumba long mynta, ki Pulit kila kem ïa 3 ngut ki briew ha kaba ïadei bad kane ka jingjia. Ïa kine ki arngut la kem hynne ka step na East Jaiñtia Hills.
Lah ban pynkynmaw ba ha ka 6 tarik Naitung, ki Pulit kila lap ïa 4 tylli ki metïap ba la tehlang bad ba shah mait da ka wait na khlieh, ha kawei ka jaka khlaw jong ka shnong Umpleng East Jaiñtia Hills.
Kine ki 4 ngut kiba shah pynïap dusmon ki kynthup u Nazar Kyndait (33 snem) na Dkhiah East, u Luba Tamang ba na Umpleng East Jaiñtia Hills Meghalaya, u Ravi Rai (23 snem) na Elam, Nepal bad u Rajesh Rai (26 snem) na ka shnong Dharan Sunsari, Koshi Anchal, Nepal.
Ki pulit kim pat pynpaw satia ïa ki kyrteng jong ki briew ba shah kem namar ka jingtohkit ka dang ïaid shakhmat.
Halor kane ka khubor na ka liang jong u Superintendent ki Police East Jaiñtia Hills District u ïathuh ba ki Pulit hadien ba ki la ïoh jingtip halor ka jingshah pynïap ki saw ngut ki briew ha ka shnong Umpleng kaba la jia ha ka 6 tarik mynta u bnai Naitung ki la register ejahar ïa kane ka jingjia ha Khliehriat Police Station katkum ka Case No.49(07)2024 u/s 103/3(5) BNS bad ki la trei shitom ban ïohkem ïa baroh kiba donkti ha kaba shim ïa ka jingim jong ki saw ngut ki briew.
Haduh mynta ka sngi ki Pulit ki la ïoh ban kem haduh 3 ngut bad ïa ki kyrteng bad ka jaka shong jaka sah jong kine kiba la shah kem ki Pulit ki dang buhrieh namar ba ki ong ba ki dang pynlong ka jingtohkit ban lap ksai sa ïa kiwei pat kiba donkti.
