Halor ki 3 tylli ki mat, pynkhreh kiwei pat ki Party ban ther ïa ka VPP ha ka elekshon MDC : Ardent

0

Shillong, Naitung 15: U Bah Ardent Basaïawmoit, President ka VPP, u la ong ba ka Seng ka la ïoh jingtip ba kiwei pat ki Party ki la pynkhreh ban ther ïa ka VPP ha kane ka elekshon MDC halor lai tylli ki mat. Haba kren ha ka jingïalang ai khublei ïa ki paidbah ha Nongstoiñ, u Bah Ardent u la ong ba kine ki lai tylli ki mat ba kin leit sha ki paidbah ban ther pyrshah ïa ka VPP ki long halor ka jait Kpa, ka Article 371 bad ïa jaka ha Mawkyrwat.
“Nga la ïoh jingtip ba kin leit sha ki paidbah halor kine ki mat namar ba kim don da kiwei pat ki mat ne ki ishu ban leit sha u paidbah”, la ong u Bah Ardent. Artylli na kine ki mat, kata ka jait Kpa bad ka Article 371 kidei kiba ki la ther ïa ka VPP ha kine ki elekshon ba la dep bad mynta ki la buh sa kane ka mat ïa ka jaka ha Mawkyrwat. Halor ka jaka ha Mawkyrwat, u Bah Ardent u la ong ba u sngew sammut ba ki kylli pynban na u paidbah shano ka jaka ha Mawkyrwat, haba ïalade ki don ha District Council.
U la ong ruh ba ha ka por ba u long CEM u la i donkam ban thied ïa ka jaka hajan ïew Mawkyrwat khnang ban ïoh shna ïa ka ophis jong ka Council ban pynsuk ïa ki paidbah.
Hynrei hadien u la iehnoh kam kum u CEM ka KHADC bad u trai jaka u la ïoh ka bai boina kaba kumba 10 lak tyngka ban thied ïa ka jaka. Namar ba u trai jaka um pat ïoh lut ïa ka pisa bai khyndew um shym la treh ban ïathoh ïatar ïa ki kot khyndew.
“Mano hi u trai khyndew u ban ai ïa ka jaka ne ïathoh kot haba ym pat ïoh lut ia ka pisa”, la ong u Bah Ardent.

Leave A Reply

Your email address will not be published.