Shillong, Kyllalyngkot 13: Kum shi bynta ban ai mynsiem bad kyntiew ïa ki samla khasi ha ka jingïalehkai kriket, ka Samkhamti hynne ka Sngi Saitjaiñ (13 tarik u Kyllalyngkot) ka la noh jingïarap da kaba pynïoh Jersey sha ka Laitkor Cricket Club.
Ha kane ka sngi sam Jersey la ïa don ryngkatlang u Pa iem Ainam Manik Syiem jong ka Hima Mylliem, u Bah Samborlang Diengdoh-u rangbah ba ju don bynta ban kyntiew ïa ki samla ha ki Sports bapher bapher, nangta u President jong ka kynhun Latkor-u Bah Bah Syrpailang Kharkongngor lem bad ki dkhot jong ka kynhun.
La ïoh ruh ka jingkren lyngkot na u Bah Samborlang bad u Paiem Ainam Manik Syiem shuwa ban aiti ïa ki Jersey sha u President jong katei ka kynhun.
Hadien ba la sakhi ïa ka jinglah ban lehkai bha ki samla khasi kiba ïashimbynta ha ka lympung lehkai Shillong Cricket League kaba ïaid shakhmat mynta, ka Samkhamti ka la shim ïa ka rai ban ai jingïarap da kaba pynïoh Jersey na bynta katei ka klob.
Haba ai jingkren sha ki lad pathai khubor, na ka liang jong u Bah Samborlang u la pynpaw ïa ka jingdonkam ban ai mynsiem ïa ki samla khasi ha ka kriket. “ Kumba ka paw ba bun sien hi ki samla khasi kim da shimkhia than ïa ka kriket hynrei katba dang ïaid ki sngi ngi la sdang ban ïohi ïa bun ki samla kiba don shisha ïa kata ka sap ha kane ka jingïalehkai, bad ban tyngkai ïa kane donkam ban ai mynsiem khnang ban kyntiew ïa ki,” la ong u Bah Samborlang ryngkat ka jingai mynsiem ïa ka kynhun Laitkor ba kan nang kiew shaphrang.
Lah ban kdew hangne ba ka kynhun Laitkor Cricket Club ka dei kawei na ki kynhun ba ïashimbynta ha ka lympung Shillong Cricket League ba dang ïaid mynta ha madan Urkaliar. Watla kane ka kynhun ka la sei madan da tang ki samla khasi ban ïalehkai ha katei ka lympung, hynrei ka jinglah ban lehkai bha jong ki, ka la pynthikna ïa ka kynhun ban rung sha ka Pre-Quarter final mynta u snem.
