Ka jingkyntiew ïa ka kam thaiñ jaiñ kaba ïaineh : ka jingbha ka kham kongsan ban ïa ka jingbun

Giriraj Singh
Myntri Sorkar Pdeng ba dei khmih ïa ka Tnat Textiles

New Delhi, Nailar 4 : Ngin rakhe ïa ka National Handloom Day kaba 10 ha ka 7 tarik Nailar, 2024. Kumba baroh ngi ïatip, la sdang ïa ka Swadeshi Movement ha ka jingïalang kaba la long ha ka 7 tarik Nailar, 1905, ha Town Hall, Kolkata.
Ka jingïakhih kaba long shi bynta ka jingïakhun ïa ka jinglaitluid ka thmu ban pynkhie im ïa ki tiar kiba don ha ka ri bad ban shna ïa ki. Ban kynmaw burom ïa kane ka sngi ba kyrpang bad ban rakhe ïa ka dustur thaiñ jaiñ jong ngi, u Myntri Rangbah duh, Narendra Modi u la pynbna ïa ka 7 tarik Nailar kum ka National Handloom Day ha u 2015. Kane ka jingïalang ka long ban pyndon burom ïa ki briew kiba thaiñ jaiñ bad pynkhlaiñ ïa ka kam thaiñ jaiñ.
Ka Kam thaiñ jaiñ ka long ka tyllong ba kongsan jong ka kamai kajih ha ki jaka nongkyndong bad khap sor, ha kaba ki don palat 35 lak ki briew kiba trei ïa kane ka kam. Na kine, palat 25 lak ki dei ki kynthei. Kumta, kane ka kam ka long ka tyllong kaba kongsan ban pynkupbor ïa ki longkmie ha ka ïoh ka kot. Ka Tnat Textile ka la shim bun ki sienjam ban kyntiew ïa ka kam thaiñ jaiñ ha kylleng ka ri.
Nga kwah ban pynkynmaw ïa ka “Mann Ki Baat” jong u Myntri Rangbah duh ha ka 28 tarik Naitung 2024 ha kaba u la kren shaphang ka jingkongsan ka kam thaiñ jaiñ ban pynkupbor ïa ka ïoh ka kot jong ki longkmie ha ki jaka nongkyndong. U la kren ruh shaphang ki startup ba thymmai kiba pyndonkam ïa ka teknoloji ba mynta ban pynshlur ïa ki mar shna kti bad ka riam ka beit kaba ïaineh. U la kyntu ruh ïa ki briew jong ka ri ban kyntiew ïa ki jaiñ ba thaiñ da ka kti bad buh ïa ki ha ka social media da ka hashtag # MyProductMyPride.
Ha kine ki khyndiat snem ba la leit, ka kam thaiñ jaiñ ha India ka la long ka dak jong ka jingïaineh bad ka kam riam kam phong kaba ïaid jai jai.Mynta, nga kwah ban ban jur ïa ka jingkongsan ban phaikhmat kyrpang sha ka jingbha ban ïa ka jingïar haba ngi rakhe ïa ka jingpynkhie im biang ïa ka kam thaiñ jaiñ bad kyntu ïa ki briew jong ka ri ban pynneh ïa ka bor jong ka jingïaineh ha ka kam thaiñ jaiñ. Ka kam thaiñ jaiñ ka dei kaba hiar pateng bad kaba don ïa ka nongrim jong ka kam riam kam phong kaba ïaid jai jai, kaba ïaineh bad kaba don jingbahkhlieh.
Lyngba ki sienjam jong ka sorkar ha kine ki shiphew snem ba la leit, ka la don ka jingkylla na ka kam riam kam phong kaba ïaid bran bran sha ki mar kiba pynmih ha ki jaka lajong. U Myntri Rangbah duh, Narendra Modi da ka jingsngewsarong u phong ïa ki jaiñ thaiñ kti jong ka ri bad kyntiew ïa ki kylleng ka pyrthei bad ka burom jong ka jingjop jong ka, ka leit sha u. Ka por ka la dei ïa ki briew ban ïasoh bad ka jingïakhih.
Nalor ka jingkyntiew ïa ka jingïaineh, ka kam thaiñ jaiñ ka plie lad ban pynkupbor ïa ki longkmie bad kito kiba kham duna ka ïoh ka kot, da kaba plie lad ïa ki ha ka ïoh ka kot bad ka jingwanrah ïa ka jingsngew sarong shaphang ka jingtbit jong ki ha la ka kam. Nga pdiang ïa ka bynta ba kongsan ba ki longkmie ki long ki nongthaiñ ksai, ki non gwieh rong ïa ki ksai bad ki nongthaiñ jaiñ ban kyntiew ïa kane ka kam, nga ïaroh ïa ki jingnohsynniang jong ki. Nga tip pura bad burom ïa ki jingnohsynniang jong ki jaitbynriew tynrai bad khamtam ki longkmie ha kylleng ka ri, ha kaba khlem ma ki, ka kam thaiñ jaiñ ka lah ban mad shibun ki jingeh.
Kalong kaba donkam ban burom ïa ki ban pynneh bad kyntiew ïa ki jingnohsynniang jong ki. Shuh shuh, bun ki cooperative ba lamkhmat da ki longkmie bad ki self help group ki la paw hapoh ka kam thaiñ jaiñ. Kine ki kynhun ym tangba ki ai jinghikai bad ki jingdon jingem hynrei ki kyrshan ruh ïa ka kam kaba kyntiew ïa ka jingïatylli bad ka bor jong ka jingiatreilang ban ïadait dor. Da kaba ïawanlang, ki SHG jong ki longkmie ki lah ban ïoh ïa ki dor ba biang na ka bynta ki mar jong ki, ki ïoh ban pynïaid ïew, bad ïoh ïa ki bai-nong bad ki rukom treikam ba biang. Ki prokram ai jinghikai bad ki sienjam ki thmu ban kyntiew ïa ki sap thaiñ jaiñ, ka jingsaiñdur thymmai, bad ka jinglah ban seng kam lajong ka ban pynkupbor ïa ki longkmie. Da ka jingtbit ha ki rukom treikam ba thymmai bad pyndonkam ïa ki jingsaiñdur katkum ka por mynta, ki longkmie ki lah ban shna ïa ki tiar kiba kham bha ba lah ban ïaid ïew bha, bad pynthikna ïa ka jingïaineh ka kam jong ki.Ka jingkyntiew ïa ka jingpynbha shuh shuh da ka embroidery bad ka printing ka wanrah ïa ka jinglong ba thymmai ïa ki jaiñ tynrai, ha kaba ngi ïoh ïa ki jaiñ kiba phylla, kiba kyrpang bad kiba ïaid ïew bha. Da ka jingkynthup ïa ki rukom bapher bapher kum ka zardozi, kantha, lane chikankari, ki barikor ki lah ban pynkylla ïa ki jaiñ ba thaiñ hi sha ki jaiñ ba itynnad bad kiba kyrpang. Kane ka kyntiew ïa ka jingitynnad bad ka dor jong kine ki jaiñ ha ki ïew ha kaba ki nongthaiñ jaiñ ki ïoh nong shuh shuh.
Ka jingpynïasoh lang ïa kine ki rukom kyntiew ïa ki jaiñ bad ki jaiñ tynrai ka wanrah ïa ki jaiñ kiba ïaid ïew ha ki jaka tynrai bad ruh ha ka riam ka phong katkum ka juk mynta. Kane ka jingïakhleh ka pynneh bad ka khyllie im ïa ki rukom trei tynrai bad ka kyntiew ïa ka kam ka riam ka phong kaba ïaineh da kaba pynshlur ïa ka jingpyndonkam ïa ki jaiñ kiba thaiñ da ka kti bad ki bym ktah ïa ka mariang.
Ka jingpynïasoh ïa ka teknoloji bad ka jingsaiñdur thymmai ha ka kam thaiñ jaiñ ka kyntiew ïa ka jingngiah ba ki nongthaiñ jaiñ kiba la tbit ki sngew na ka por sha ka por, ka jingkyntiew ïa ka jingseisoh, bad ka jingpynneh ïa ki rukom trei tynrai. Shuh shuh, ka software computer-aided design (CAD) ka ïarap ïa ki nongthaiñ ban pyrshang ïa ki nuksa ba kham eh bad ki jingkhleh rong hashuwa ban sdang ka jingthaiñ. Kane ym
tangba ka tyngkai ïa ka por hynrei ka pynduna ruh ïa ka jingma jong ki jingbakla, kaba ïalam lynti sha ka jingpynmih ïa ki jaiñ kiba kham bha. Ki rynsan digital bad ki website e-commerce ki plie lad ïa ki nongthaiñ ban poi sha ki ïew ba bun, da kaba pynïasoh ïa ki beit beit bad ki nongthied bad pynduna ka jinghap shaniah ha ki nongdie pateng.
Ban kynmaw burom ïa ka National Handloom Day mynta u snem, nga kyntu ïa baroh ban shim artylli ki jingbam smai mynta ka sngi; kawei ban shon selfie bad ki tiar shna kti bad buh ha ka social media; kaba ar ban bam smai ban kynthup ïa ki jaiñ handloom ha ka jingim ba man ka sngi. Da kaba jied ïa ki tiar shna kti, ym tangba ngi rakhe ïa ka jingitynnad bad jingïar ki kam thaiñ jaiñ tynrai hynrei ngi nohsynñiang sha ka kamai kajih jong ki barikor, kaba pynthikna ba ki sap ba kordor jong ki, ki hiar sha kawei pat ka pateng.
Ka long kaba kongsan ban phaikhmat kyrpang sha ka jingbha, jingskhem bad ka teknoloji ha ka kam thaiñ jaiñ. Ka kam thaiñ jaiñ ka lah ban long kaba kham phuhmat lada wanrah ïa ki mar bad ki rukom treikam ba saiñdur thymmai. Baroh ki dei ban kyrshan ïa ki nongshna tiar bad ki nongthaiñ jaiñ tynrai bad kynmaw ïa ka jingthied ïa ki mar jong ki, kaba ktah ïa ngi, ki briew kiba shna ïa ki bad ka pyrthei baroh kawei. Ka jingphaikhmat sha ki jaiñ tynrai, ka kam khaïi kaba hok, ka jingpynmih ïa ki mar ha ki mar bapher bapher, ka jingïaineh bad ka rukom saiñdur tynrai, kan ïarap ïa kane ka kam ba kan kiew shaphrang bad ai ïa ki nongthaiñ jaiñ ka bynta kaba ki dei ban ïoh. Da ka jingkyrshan ïa ka kam thaiñ jaiñ, ym tangba ngi pynneh ïa ka deiriti kaba riewspah hynrei ngi jop ruh ha ka jngpynkupbor ïa ki longkmie bad ka jingryntih hapdeng kynthei bad shynrang, bad kot ruh sha ki thong Sustainable Development Goal (SDG) 2030 jong ka United Nations.