Shillong, Nailar 05: Mynta ka sngi ki bor ba ha khlieh jong ka kynhun shipai Border Security Force (BSF) la bthah ïa baroh ki Commandant jong ki Border Out Post (BOP) ha khappud bad ka Bangladesh namar ka jingïakhih kaba la nang jur hapoh Bangladesh.
Ki bor ba ha khlieh jong ki shipai BSF kila bthah ïa baroh ki Commandant jong ki BOP kiba don ha khappud bad ka Bangladesh naduh West Bengal, Assam, Meghalaya bad Tripura ba kin kham long kiba peitngor ha khappud ban nym don kano kano ka jingjia na ka daw jong ka jingïakhih sha Bangladesh bad la bthah ruh ba kin pynjur ïa ki jingpahara jong ki ha kine ki jaka.
Haduh mynta ka sngi kam shym don kano kano ka jingjia ha khappud ka India bad ka Bangladesh, hynrei ki BSF kila long kiba la khreh ban ïada ïa u pud u sam ha khappud bad ka Bangladesh namar kane ka jinghiar shuki kynsan ka Myntri Rangbah duh jong katei ka ri ka Sheikh Hasina ka la long kaba ym shym la poi pyrkhat.
