Shillong, Nailar 05: Ka seng Hynñiewtrep Youth Council (HYC) ka la kyntu ïa ka sorkar jylla ban long kaba peitngor ha ki jaka bad ki shnong ba khappud jong ka India bad Bangladesh na ka jingwan rung jong ki nongshong shnong ka Bangladesh sha India na ka daw jong ka jingkhih ka hima sima hapoh katei ka ri.
Ha ka kyrwoh khubor u President ka HYC u Bah Roykupar Synrem u la ong, “Ngi sngewkhia halor kane ba ka lah ban don ka jingwan rung tuh jong ki briew kiba nabar ri lyngba ki khappud ne lyngba ki jylla lyngba ka khappud ka ri Bangladesh, kiba lah ruh ban shong riehtngen hapoh ka ri ne kiba lah ruh ban long ki nongrung tuh kiba beaiñ.”
“Namar kata ngi kyntu ïa ka sorkar jylla ban pyntreikam bha ïa ka Directorarte of Infiltrations ban trei mied la bat sngi ban talasi ïa ki bar jylla bad ki mynder ri kiba thmu ban wan sha kane ka ri bad kumjuh ruh sha ki shnong bad ba dei ban bthah ïa ki pulit ban peitngor bha haba ïadei bad ka ïaid ka ïeng jong ki briew kiba ishan khmat bad ba dei ban don ruh ka jingïatreilang bad ki Dorbar Shnong ha kaba ïadei bad kane ka kam,” u la ong.
