Kular u Symbud Myntri Rangbah ban ïarap 5 lak tyngka ïa ka Khanduli Secondary School

Jowai, Nailar 05: U symbud myntri rangbah ka jylla Meghalaya, u ma Sniawbhalang Dhar, ha kane ka 3 tarik August, 2024 ula hiar sha ka shnong Khanduli ka shong kaba don ha khappud bad ka jylla Assam ban ïa kynduh bad ki nongïalam jong kane ka shnong halor ki ba bun ki mat ba ka shnong ka ïa kynduh naduh ka shong suk shong shngaiñ, ka roi ka par bad kiwei de ki jingeh ba ki ïa kynduh.
Ha kane ka sngi, u symbud myntri rangbah ula jurip ruh ïa ka School Khanduli Secondary School ka ba la seng bad pynïaid da ka Durbar Shnong Khanduli ha ryngkat ka jingïadon lang jong ki nonghikai jong kane ka School, ki dkhot ka SMC bad ki nongïalam shong.
La ïoh ruh ban plie ïa ka Fate jong ka Dorbar Shnong Khanduli, kaba ki thmu ban pynmih pisa kyrpang naka bynta ka Khanduli Secondary School kaba la kyntiew kyrdan naduh u snem 2015 sha ka Secondary School.
Ïaka jingïalang ba lyngkot la pynïaid da u bah K. Bina Asst. Waheh Schong Khanduli, ka jingkren pdiang burom la ïoh na u Tbn K.S Langshiang bad ka jingkren maitphang na u bah Yoshida Nongspung Waheh Shnong Khanduli, uba la pynpaw ïa ka jingsngewnguh ïa u MLA ka thaiñ u bym juh iehnoh ïa ka shong ha man ki jingeh ba ki ïa kynduh.
Kiwei de ki rangbah ki ba ai jingkrem ki kynthup ïa u ma C Daw Dolloi Elaka Nogjngi, ma Lieh Sungoh na Mynsngat, ma Mutshwa Thabah Waheh shnong Sohphoh.
La ïoh ruh ban pynsngewïia ki jingeh baka School ka ïa kynduh, naduh ki building, lynti ïaid kjat bad khamtam ka tulop jong ki nonghikai. Lyngba ka memorandum ba la pule da I nonghikai jong ka skul, la pynsngew ba ka jingsiew tulop ïa ki nonghikai ka la kot sha duh ka 4,44,000/- tyngka ha ka shisnem.
U kongsan, ha ka jingai jingkren ula ai khublei kyrpang ïa ki riew rangbah jong ka shong khanduli bad ïa ka jingïohi jngai jong ki ban seng ïa kane ka shlem ai jinghikai hapoh ka shong ka thaw ka ban long ka jingmyntoi pateng la pateng ïa ka shong ka thaw. U la pynpaw ba, um ju klet ïa kane ka shul bad lah bunsien u la ïarap, naduh ka building bad kiwei de ki jingdonkam.
U la kyntu ïa baroh ki nongshong shnong ba ki dei ban kam trai ïa kane ka skul bad ba ki dei ban kyrshan lang ïa ki nongïalam bad nongpynïaid jong ka skul. Ula sneng ïa ki kynnah skul ba ki dei ban trei shitom bad kim dei ban buh jingthmu ban pule tangban ïoh kam sorkar, hynrei ki dei ban pyntbit ïalade ha ki kam ba ki kwah ban trei namar don bun ki lad ki lynti ban trei ban ktah ynda ki la don ka jingnang jingstad ba biang.
U symbud myntri ula kular ruh ban kyrshan lang ïa ka skul kumba 5 lak tyngka, ban ïarap lem ïa ki jingdonkam jong kane ka skul ha ki ba bun ki bynta.
Ïa ki kyntien ai khublei la ïoh na u bah C.M Nongrum Secretary Shnong Khanduli bad la pynphuh pynphieng ïa kane ka sngi da ki jingshad bad jingrwai na ki khynnah skul ka Khanduli Secondary School.