Nongpoh, Nailar 05: Hadien ka jingther u lapbah bala neh bun kynta, ki surok bad ki pynthor haka thaiñ Nongpoh bad kylleng ki jaka ka dong Ri-bhoi kila kylla long kum ki wah, kaba la ypnthud ruh ïaki paidbah kiba leit ba wan ha shilynter jong u surok.
Katei ka jingshlei um kala ktah ruh naduh ki dukan, ki kali ba ïaid ha surok bad khamtam ki khynnah skul kim ïoh lad ruh wat tang ban jam na shilliang sha shilliang surok.
Kum kine ki jingshlei um ki dei kiba ju jia naka por shaka por bad kane kam dei shuh ka jingjia ba nyngkong namar tang dala jur slap bun ki jaka kila hap ban mad ka jingshlei um bad rung wat haduh ki dukan bad iing briew.
Lah ruh ban ong ba ka daw kaba la pynlong ïa kane ka jingshlei um, ka dei ka jingbym biang ki nala ha shilynter u surok bah National Highway, watla ki paidbah naka por shaka por kila ju ud ju nam ban pynsngew ïa kine ki jingeh, hynrei ym shym la don satia ba shimkhia haduh mynta bad kum ki paidbah kila hap ban mad ka jingshlei um ba khah khah man ka por ba ther u lapbah.
