Rakhe ka District SANKALP Hub EW ïa ka sngi rakhe ïa ka International Girl Child Day 2026

Mawkyrwat, Risaw 29: Ka District SANKALP Hub for Empowerment of Women, South West Khasi Hills District, Mawkyrwat, hapoh ka tnad treikam jong ka Social Welfare jong ka Sorkar Meghalaya, mynta ka sngi ka la pynlong ïa ka jingrakhe ïa ka International Girl Child Day 2026 ha ryngkat ka jingïashimbynta jong u bah E. Tariang, District Social Welfare Officer, ki khynnah pule bad ki nonghikai na ki skul bapher bapher hapoh ka district ha St. Vianney’s Auditorium, Mawkyrwat.
Ïa kane ka jingrakhe la pynlong hapoh ka phang, “End Child Marriage and Invest in Girls’ Rights” kum shi bynta jong ka prokram Beti Bachao Beti Padhao (BBBP).Ka thong jong kane ka prokram ka long ban pynsngewthuh paidbah shaphang ki hok jong ki khynnah kynthei, ka jingdonkam ban ïada ïa ki khynnah na ka jingshongkha khynnah, bad ban pynthikna ba ki khynnah kynthei kin ïoh ïa ki kabu kiba ryngkat ha ka pule puthi khnang ba kin lah ban tei ïa ka lawei kaba kham bha.
Ha kane ka program, u bah P.M. Wahlang, District Child Protection Officer, District Child Protection Unit, South West Khasi Hills District, Mawkyrwat, kum u symbud kongsan ha ka jingkren kyrpang jong u, u la ai jingbatai halor ka phang “Child Rights” ne “Ki Hok jong ki Khynnah”, da kaba ban jur ïa ka jingdonkam ban sumar, ban ïada bad ban pynneh ïa ki hok jong ki khynnah ym tang mynta hynrei na ka bynta ka lawei ka ban sa wan ruh.
U Dr. S. Maxwell Lyngdoh, Counsellor bad Career Expert na Shillong, Meghalaya, u la ai jingkren sha kiba ïashimbynta halor ka phang, “End Child Marriage and Invest in Girls’ Rights”, kum shi bynta jong ka prokram Beti Bachao Beti Padhao (BBBP) ha kaba u la ban jur ïa ki khynnah skul ba ki dei ban kiar na ka jingshongkha ne ïoh lok ha ka por ba ki dang don hapdeng jong ki jingpule namar kan ktah ïa ki shimet, ka ïing ka sem, ka shnong ka thaw bad kumjuh ruh ïa ka pateng jong ki khun ki kti jong ki.
“Khnang ba ka lawei jong ki kan long kaba phyrnai, kim ban buh ha ki ïa ka jingpyrkhat na ka bynta ban ïoh samla noh bad ïoh khun ha kaba por ba ki dang don ha ka jinglynti jong ka jingpule namar ïoh ka jingim jong ki ka long ka jingim jong ka jingbabe”, u la ong. Ha ka juh ka por u la pynkynmaw ruh ba, “Ka Meghalaya jong ngi ka poi 16.3%, ka Assam 31.8% bad ka Tripura ka dei haduh 40.1% ka jingïoh lok ne shongkha kiba dang rit karta katba ka Mizoram bad ka Nagaland pat ki duna”.
Kum shi bynta jong kane ka prokram, la sam ïa ki khusnam bad ki memento sha ki nongjop ha ki jingïakop bapher bapher, kynthup ïa ka jingïakop dro dur, ka jingïakop thoh slogan bad ki jingïakop mareh 5 kilometre ; Kata ha ka jingïakop dro dur, ka Meribha Lyngdoh ka la ïoh ïa ka khusnam ba nyngkong, ka Laribha Lyngdoh, ka la ïoh ïa ka khusnam ba ar kine na Christian Academy Secondary School, Mawkyrwat, katba u Bankitbok Pyngrope na Marshilong Presbyterian Higher Secondary School, Mawshillong, ka la ïoh ïa ka khusnam ba lai.
Ha ka jingïakop thoh slogan, u James Rynold Nongsiej na Rangmaw Church of God Secondary School, Rangmaw, u la ïoh ïa ka khusnam ba nyngkong, ka Darisha Nongsiej na Modern Academy Higher Secondary School, Rangmaw, ka la ïoh ïa ka khusnam ba ar, katba u Wadborlang Wanniang na Rising Secondary School, Sohkhylam, u la ïoh ïa ka khusnam ba lai.
Ha ka jingïakop mareh 5 – kilometre jong ki kynthei kiba la palat 15 snem ka rta, ka Phidashisha Lyngdoh ka la jop ïa ka kyrdan ba nyngkong, ka Lyntijingkyrmen Kharjahrin ha ka kyrdan ba ar, katba ka Marisuklin Sohphoh ha ka kyrdan ba lai. Nangta, jong ki shynrang hapoh 16 snem ka rta, u Banteibok Kharjahrin u la jop ïa ka kyrdan ba nyngkong, u Bankitbok Kharlyngdoh ha ka kyrdan ba ar, katba u Kynsai Ramsiej ha ka kyrdan ba lai.
Khynnah kynthei hapoh 15 snem ka rta, ka Ribapynsuk Nongsiej ka la jop ïa ka kyrdan ba nyngkong, ka Damanbha Wartde ha ka kyrdan ba ar, katba ka Ibanlamlynti Wartde ha ka kyrdan ba lai. Kumjuh ruh ha ka kyrdan jong ki nongmareh kiba dang khynnah tam dei ka Aibashisha Wartde na ka liang jong ki khynnah kynthei bad u Banshemphang Syiemlieh jong ki khynnah shynrang.
La pynphuh pynphieng ïa kane ka prokram lyngba ki jingrwai na ka Baiamonlang Marbaniang bad kynhun, bad ruh na u Melkipaul Marweiñ bad ban pynsngewthuh shuh shuh ïa ki jingeh kiba ktah ïa ki khynnah kynthei bad ka jingdonkam ban ïada ïa ki hok jong ki ka la don ruh ka drama lyngkot na ka J.D. Entertainment.
Ïa ka prokram la pynïaid da u George Shangpliang, ka jingkren pdiang sngewbha na ka Evary Lyngkhoi, District Mission Coordinator, District SANKALP Hub for Empowerment of Women, South West Khasi Hills District, Mawkyrwat bad ka jingkren ai khublei na ka Memory Marweiñ, Centre Administrator, One Stop Centre, South West Khasi Hills District, Mawkyrwat.