Nongstoiñ, Risaw 29: Ka Lyngngam Presbyterian College Mawthengkut ha ka sngi palei jong ka taiew kaba dei 29 tarik Risaw 2026, ka la ïoh ban rakhe ïa ka College Foundation Day kaba Shiphew bad kumjuh ïa ka Graduation Day kaba Saw ha ka jingïalang kaba la long ha phyllaw jong ka Collge hapoh ka shnong Nongkyna Mawshynrut Civil Sub Division.
Ha kane ka sngi ba kyrpang jong ka College la don ryngkat ruh ban pynshit pynshngaiñ bad ai mynsiem da u MDC ka thaiñ u Bah Srally Rashir kum u kongsan, ha ryngkat ka jingïadonlang ruh u bah Miki Pohsna SDO ka Mawshynrut Civil Sub Division kum u symbud kongsan, u Dr. B.L Peiñlang Principal, ki Pastor, ki nonghikai, ki samla pule bad kiwei kiwei.
Na ka liang u Bah S. Rashir MDC haba ai jingkren ha ka jingïalang, u la ong kane ka juk kaba mynta ka dei ka juk kaba la kyrduh kam bad kaba la eh ruh ban ïoh kam, namar ka jingpass ki samla pule ha ki kyrdan bapher bapher manla u snem ka nang bun. Hynrei, u la ong pat ba kato ka syrnod kaba ki samla pule ki ïoh ha kaba kum kane ka sngi, ka la long lypa kum ka jingïada na ka bynta ka lawei ka jong ki.
U la ai mynsiem ïa ki samla pule kyrpang eh ba kin nang trei shitom bad ban aiti ïalade ha ki lynnong kot ki jong ki ba kin nang lah ban kiew shakhmat ha ki liang baroh. U la kyrkhu kyrdoh ruh ïa ka College bad ki nonghikai ba kin nang jam shakhmat ban tbeh ïa ka jingshai lyngba ka jingnang jingstad sha ka thaiñ baroh kawei.
Katba na ka liang u Bah Miki Pohsna SDO ka Mawshynrut Civil Sub Division, haba ai jingkren ha katei ka jingïalang u la ong ïa ki samla pule kiba la pyndep ïa ka BA na katei ka College, ki dei ban puson bad pynshong nongrim bha aiu kin leh nangne shakhmat haba ki la pass ïa ka BA. Ka long ka kamram jong uwei pa kawei ki samla pule ban don ka thong ha ka jingim shano ki thmu ban poi.
Ha kane ka sngi na ka liang jong ka College kala ïoh ruh ban pynkup burom bad ai syrnod ruh sha ki samla pule kiba la pyndep ïa ka jingpule BA na katei ka College.
