Shillong, Risaw 11: Hynnin ka Sngi Hat Majai na ka liang jong u Bah Finely L Pariat (General Secretary jong ka MSOA) u la pyntip ba ka jylla Meghalaya ka la thikna ban ïoh shimbynta ha hynñiew tylli ki jait jingïalehkai ha ka lympung jong ka National Games ka ban sa long ha Goa.
Kine ki jingïalehkai kiba ka Meghalaya kan sa ïoh ban shimbynta ha katei ka lympung kin kynthup ïa ka Athletics ban mihkhmat da arngut ki nongïalehkai, Football jong ki shynrang, ha ka jingïakop jngi (Swimming) ka ban mihkhmat da saw ngut, Wushu i wei, Judo i wei, Golf ban mihkhmat da saw ngut bad ka ïakop siat (Shooting).
Haba ïakren sha ki lad pathai khubor, na ka liang jong u Bah Finely L Pariat u la pynpaw ba nalor kine ki hynñiew tylli ki jingïalehkai, ka Meghalaya ka kyrmen ba kan dang ïoh shuh kham bun ki jingïalehkai kiba ka jylla kan lah ban shimbynta katba ka rai kaba khadduh yn dang hap ban ap na ki bor pynïaid jong ki synjuk ïalehkai jong ka ri.
Ha kaba ïadei bad ka jingpynkhreh na bynta kane ka lympung lehkai sha Goa, u Bah Finely u la pynpaw ba ka jylla ka la pynkhrehbha khamtam ha ka phutbol, kaba dei ka jingïalehkai ba ka jylla ka kyrmen ban wanphai ryngkat bad ka takma.
Ka kynhun lehkai phutbol ban mihkhmat ïa ka jylla ki don haduh 20 ngut ki nongïalehkai ryngkat bad san ngut ki Official, bad ïa kane ka kynhun yn lamkhmat da u Bah Khlaiñpyrkhat Syiemlieh kum u Coach.
