Shillong, Risaw 11: Ka resol jong ki lai tylli ki jingïakhun ka lympung SSA SRGT 3rd DIVISION Football League 2023 kaba la long ha madan 1st Ground SSA Stadium, Polo hynne ka Sngi Balang.
La ïoh ban sdang ïa ka jingïalehkai naduh ka por 1:10 baje nohphaisngi, bad ka jingïakhun ka la long hapdeng ka Mawshbuit SC pyrshah ïa ka PFR FA, ha kaba ka PFR FA ka la khur ïa ka namjop da 2 kol khlem da shah thep.
Dei lyngba u Fleming Suting (44 minit) ba ka PFR FA ka la ïoh ban pynkhihjar nyngkong katba ka kol kaba khadduh ka la wan na u Andy Suting ha ka 55 minit.
Ka jingïakhun kaba ar, kaba la sdang ha ka por 3 baje janmiet hapdeng ka Umpling SC pyrshah ïa ka Lumparing SC ka la kut ha ka jingïakhaid, hadien ba baroh ar kynhun ki la ïoh ban thep mar 2 kol. Ka Umpling SC ka la ïoh ban lamkhmat nyngkong ïa ka jingïalehkai lyngba u Klinton Roy Mylliem umlong (5 min) hynrei ka Lumparing SC ka la ai jubab lyngba u Gilbert Nongneng ha ka minit kaba 10, u ba la thep ruh ïa ka kol ban lamkhmat kylla ïa ka jingïakhun ha ka minit ba 22.
Wat hadien ba ka por ka sah satang khyndiat, ka Umpling SC kam shym la kynrandien bad dei ynda la jam sha ka 80 minit ba u Donbok Sing L Lyngkhoi u la ïoh ban pynïakhaid.
Ka jingïakhun kaba lai hapdeng ka Mylliem Lum SC ka la mad namrem ha ka Sanmer SC da 1-2 kol.
Ka shi kol na ka Mylliem Lum SC la thep da u Michael Kurbah (71min), katba ki ar kol na ka kynhun ba khur namjop (Sanmer SC) la thep da u Babitdor Dorphang ha ka 47 & 73 minit.
Mynta ka sngi yn sdang ïa ka jingïalehkai ha ka por 1:10 baje mynsngi ha madan 1st Ground SSA Stadium hapdeng ka Tynring SC pyrshah ïa ka Nongumlong SC, bud sa ka jingïakhun hapdeng ka Umlyngka SC pyrshah ïa ka Gorkha Association ha ka por 3 nohphaisngi, jaka ha 1st Ground SSA Stadium, bad ka jingïakhun kaba lai kan long hapdeng ka Lumdiengjri SC pyrshah ïa ka Lawmali Pyllun SC, ka ban sdang katjuh ha ka por 3 baje nohphaisngi katba ka jaka kan long ha madan 3rd Ground MFA Turf.
