Shillong, Risaw 28 : Lai ngut ki thei ïalehkai kriket na ka jylla Meghalaya ki la shah jied ha ka kynhun jong ka North East ban ïashim bynta ha ka lympung ïalehkai Senior Women’s Inter Zonal T20 Trophy kaban sa pynïalehkai ha u bnai ban wan.
Katei ka tournament ba pynïaid da ka BCCI kan sdang naduh ka 8 tarik haduh ka 16 tarik Naiwieng ha Lucknow.
Ki lai ngut ki thei ïalehkai kriket ka jylla Meghalaya ba ka Zonal Selection Committee ki la jied ha ka kynhun ïalehkai ka NorthEast ki kynthup ïa ka Debasmita Dutta (kaba dei ka thei tied bad kawang bol spin), ka Ajima Sangma (ka thei kawang fast bowler) bad ka Monica Lyngdoh Phawa (kaba dei ka wicket keeper). Baroh kitei ki lai ngut ki la mihkhmat ïa ka jylla Meghalaya ha ki lympung ïalehkai bapher bapher ba la pynlong da ka BCCI.
La jied ruh ïa ka Saranya RS kum ka coach, bad ka Kong Mary Balahun Sawkmie kum ka physio, ha kaba baroh arngut kin dei ki suppoet staff napdeng saw ngut jong ka kynhun North East team.
Ïa ki 15 ngut ki thei ïalehkai la ïoh ban jied ha na ki hynriew tylli ki jylla ka thaiñ North East ba kynthup na Meghalaya, Sikkim, Nagaland, Arunachal Pradesh, Manipur bad Mizoram. Ka Assam bad Tripura ki shah kynthup ha ka kynhun ïalehkai jong ka East Zone.
Ïa ka tournament yn pynlong da ka league-cum-knockout bad baroh ki kynhun kin hap ban poi noh ha ka 6 tarik Naiwieng.
