Ka Congress ka long kaba la pynkhreh bha na ka bynta ka election shiteng samoi jong ka MP Lok Sabha : Pala

Shillong, Nailur 25 : Ka Congress ka long kaba la pynkhreh bha na ka bynta ka election shiteng samoi jongka MP Lok Sabha katba kiwei ki seng saiñ pyrthei ki dang ïa bunkam ha kiwei ki kam saiñ pyrthei bad ïaksaid ruh ban ïatylli ong u Nongïalam ka Congress bad MP ba rim ka Lok Sabha u ma Vincent H Pala ha ka Sngi Thohdieng.
“Ngi la ïatrei shitom mynta la 5-6 bnai. Ngi la seng Nongrim ïa ka party naduh trai bad mynta bun ki samla kynthei bad shynrang ki la wan ban pynïasoh bad ka party bad nga ngeit skhem ba ngi la biang bha mynta” ong u ma Pala haba ïakren bad ki lad pathai khubor.
U la ong ba ka Congress ka don jingkyrmen bha mynta ka kynti namar ka la ïoh ban trei bha bad ïoh ban pynrung dkhot ruh ïa kiba bun ki riewkhmat thymmai naduh ki rangbah haduh ki samla kynthei bad shynrang. “ Da kane ka jingkylla ka saiñ pyrthei da ka jingleit pynïasoh ki MLA ka UDP sha ka BJP kiba bun ki la wan ban kyrshan ïa ka Congress khamtam na ka UDP bad wat kiwei kiwei ki party ruh. U la ong kam don shuh ka jingïatrei lang hapdeng ki nongïalam ka UDP bad ki nongkyrshan jongka party bad wat ha ka NPP ruh ka don ka jingkulmar jingmut kaba jur bha” ong biang u ma Pala.
Haba phai sha ka BJP u la ong wat la kane ka party ka la long kaba ar ka jingbun paid hapoh ka ïing Dorbar Thawaiñ Assembly ka jylla hadien ka jingwan pynïasoh ki 8 ngut ki MLA ka UDP hynrei kat haduh mynta pat kam pat ïoh wat tang u kyrtong ruh.
“Ka BJP kam pat pynbna wat tang ïa u kyrtong jongka ruh. Hooid ka NPP bad ka VPP ki la sdang bha ka jingïalap election tangba ha kane ka kynti nga ngeit skhem ba ka Congress kan lehbha namar ka la ïoh lad bha ban pynkhreh ïa kane ka election” ong u ma Pala
U la ong ka Congress ka la dep pynlong ïa ki jingïalang bad ki nongtrei bad nongkyrshan ba ieit jongka ha Jaintia Hiils, Ri Bhoi bad West Khasi Hills bad kumjuh ruh ha Mawphlang bad hangne hapoh Shillong hapoh kine ki taiew ban wan kan pyndep ïa kine ki jingïalang.
“Hooid ngim pat sdang ïa ki jingïalang paibah namar ngim pat tip ïa ka Tarik tangba nga tharai ka election kan long beit hapoh shibnai ne shibnai shiteng ei ei mynta tangba ngi la long kiba la pynkhreh bha” ong une u Nongïalam ka Congress.
Haba la kylli mano tharai napdeng kine ki kyrtong kiba un shem jingeh bha ban ïakhun u ma Pala u la ong ïa kata lah ban tip tad haduh ban da dep pynbna lut ïa ki kyrteng jong ki kyrtong
“ Ka long kaba eh ban ïathuh uno u ban kham khlaiñ bad shem jingeh ban ïakhun, Mynta lada nga pynlong jingïalang kiba bun kin wan. Lada pynlong ka NPP ruh kiba bun kin wan bad lada pynlong ka VPP ruh kiba bun kin wan namar haduh mynta hi ki paidbah kim pat rai ïano kin kyrshan rad bah namar kumba long mynta ka dang dei tang ka jingpynkhreh” ong u ma Pala.
“ Ka rai kan long beit jong u paidbah bad ïa mynta hi ym pat lah ban tip mano ban jop ka lah ban don ka jingkylla hadien ba ka BJP kan dep pynbna ïa u kyrtong jongka. Kumba ka paw mynta baroh ki seng pyrthei ki khlaiñ lut lait noh ka UDP namar ka la duh haduh 8 ngut ki MLA kumta ka la don beit ka jingkylla katba ka Congress pat ka khlaiñ naduh tynrai” ong u ma Pala.
Halor ki jingdawa jong ki 8 ngut ki MLA kiba leit pynïasoh sha ka BJP u ma Pala u la ong ba kim dei satia ki jingdawa kiba thymmai. “ Kine kim dei ki jingdawa kiba thymmai ki dei kiba la rim suda. Kum ka kam tih dewiong ki Seng jong ki nongkhaïi bad nongtih dewiong lem bad ma ngi ngi la dep dawa naduh mynshwa bad ka BJP lei lei ka la kular lyngba ka manifesto jongka ha ka election ba la dep. Ka sorkar ka donkam ban thaw aiñ bad phah ïa ka sha Parliament” ong u ma Pala.