Ban pynsuk ïa ki nong Meghalaya ba wan sha Kolkata, Da ka bos pyllait u Myntri ha Meghalaya House Kolkata

Shillong, Nailur 24 : U Myntri ka tnad GAD, Bah Sosthenes Sohtun, ha ka Sngi Palei u la pyllait paidbah ïa ka bos kit briew ba thymmai ha Meghalaya House, Kolkata, kaba thmu ban pynsuk ïa ka leit ka wan kaba shngaiñ, kaba suk bad kaba biang dor ïa ki briew na Meghalaya kiba wan jngoh bad wan donkam ha nongbah Kolkata.
Haba kren sha ka jingïalang, u Myntri u la ong ba ka thong jong ka Meghalaya House ha Kolkata ka long ban kyrshan ïa ki briew jong ka jylla, ki ophisar bad khamtam ïa ki khynnah skul kiba wan sha ka nongbah na ka bynta ki kam ba ïadei bad ka jingpule, bad kiwei kiwei ki prokram.
U la ong ba kane ka bos thymmai kan ai ïa ka leit ka wan kaba suk, shngaiñ bad treikam bha, khamtam ha ka jingnang kiew ka bai leit bai wan ha ka nongbah Kolkata.
U Myntri u la ong ba ka Meghalaya House ka la lah ban ai ka jingshakri ïa ki jingdonkam jong ki khynnah pule, ki nonghikai, ki kynhun, ki seng bad ki nongwan na ka jylla kiba donkam ïa ka jingïarap jong ka sorkar haba ki wan sha Kolkata bad kiwei ki bynta jong ka West Bengal.
U la pynpaw ïa ka jingdonkam jong ki samla pule da kaba ong ba ki khynnah pule bad ki nonghikai na ki bynta bapher bapher jong Meghalaya ki leit sha kiwei ki jylla ban nang tip shaphang ki rukom pule bad ki jingtreikam ha ka liang jong ka pule puthi. U la bynrap ba Kolkata ka don ïa ka histori kaba riewspah bad ka jingïadei kaba jan bad ka histori jong Meghalaya.
Da kaba pynïadei bad ka jingshakri jong ki bos STEMS ha Shillong, u Myntri u la ong ba kane ka sienjam ka la ïarap ban pynbeit ïa ki jingeh ha ka leit ka wan kiba ki khynnah pule bad ki kmie ki kpa ki mad bad ka la ïarap ruh ban pynduna ïa ka jingdheng kali ha ka nongbah.
U la ong ba ka jingshakri jong katei ka bos ha Kolkata ka thmu ban ai ïa ka jingïarap kaba kumjuh ïa ki briew na Meghalaya kiba wan sha West Bengal.
Kumta, u la kyntu ïa ki briew jong Meghalaya, khamtam ïa ki skul bad ki jaka pule, ban pyndonkam bha ïa kane ka bos ba ka sorkar ka ai. U la kyntu ruh ïa ki nongpyndonkam ban don ka jingsngew sarong bad ka jingshim bynta kum ki trai ïa kane ka jingïoh, da kaba ong ba kito kiba leit da kane ka bos kin mihkhmat ïa ka Meghalaya kum ki nongkit khubor jong ka jylla.
U Myntri u la pynpaw ïa ka jingsngewnguh ïa ka jingpynïaid bad ki nongtrei jong ka Meghalaya House, Kolkata, bad ïa ka GAD Department na ka bynta ki jingpyrshang jong ki ban pynlong ïa kane ka sienjam kaba lah ban urlong. U la kitbok ruh ïa ki ophisar bad ki nongtrei jong ka Meghalaya House ba kin ïoh ka jingjop ha ka jingshakri ïa ki briew jong ka jylla.