Ym da don kam eh ban hikai ïa kiei kiei kiba sniew, hynrei ia kiei kiei kiba bha donkam ban da pynlut por bad durïap ban pynkhlaiñ ïa ki. Ka jingim ba man la ka sngi jong ki briew ka long kaba eh ban pyrkhat bad katta katba nanghikai ïa kaba bha hynrei kaba sniew ka dang ïai ïoh jaka hi ha ka jingim. Naduh ba dang rit ki kmie ki kpa katlah katïai ki ïai ban ïa ki khun jong ki ban im ïa ka jingim kaba bha bad ki pynlut bor pynlut sor ban pynïoh ïa la ki khun ia ki jinghikai kiba bha bad kiba lah ban kyntiew ïa ka jingim jong ki khnang ba kin long ki briew kiba bha ynda ha ba ki la san. Wat ka Proverb ruh ka ong “hikai ïa u khynnah ha ka lynti kaba bha khnang ba ynda haba u la rangbah un ym kynriah noh na ka”. Hynrei ym lah ban len ba ïa ka jingsniew ym donkam ban hikai, pynban ka long kaba suk eh ban bud ïa ka.
Bun na ngi ngim da buh jingkynmaw eh ïa ki jingjia ha ka jingim jong ngi bad khamtam lei ïa kiei kiei kiba bha bun sien ngi klet noh ïa ki. Lada don mano mano ba la leh bha ia ki 99 sien hynrei ki leh bakla tang 1 sien ngi kloi ban klet lut ïa ki jinglehbha baroh bad ngin niew pynban ba kitei ki jinglehbha ki dei tang ki buit phon ban ïoh pynsniew tang shi sien. Lehse ki don shisha ki khep kiba kum kitei, bad kane ka jia hangno re hangno bad kane ka la long kawei na ki jingjia kiba pynduh jingkyrmen ia ka jingim jong ngi ki briew. Ha kine ki sngi ngi ïohi ba ka long shisha kumta bad kiba bun ki peit bad kham bat pynban ïa ka jingbakla ne ka jingduna jong kiwei bad kane ka pynlong ïa kiba bun ban duh noh ïa ki jingmyntoi kiba kham bha bun shah bad ia ki jingisih bad jingiabein iwei ïa iwei pat.
Kawei ka jingduhnong jong ka pateng bynriew ka long haba ngi ïa peit bad ïathew palat ïa ka jingbakla ne ka jingbymbiang jong kiwei. Kane ha ka jaka ba kan wanrah ïa ka jingïatei bad jingmyntoi ka wanrah pynban ïa ka jingjot jingpra ha ka long iing longsem bad ruh ha ka imlang sahlang. Kum kine ki kam ki dang ïai jia wat ki jaka ba la ñiew ba kyntang bad ba kynja mynsiem ruh kumjuh ruh ha ki jaka ba la sah da ki briew kiba la nang la stad bad kiba la shai ruh, katno tam lei ha ki jaka kiba ka bor pyrkhat jong ki briew kam pat kot bad kiba dang im ha ka jingdum jong ka jingim. Kawei na ka jingeh kaba long ka daw ba kongsan jong kane ka dei ka rukom pyrkhat jong ngi shaphang kiwei bad ba ngi ñiew ïa lade ba ngi kham bha ban ïa kiwei.
Ha ka jingshisha ki briew kiba stad ki kham sngewthuh bad ki kham sngemphang shibun ban ïa kiwei, hynrei katba nangstad ki don bun ki khep ba imat ki briew ki nang sarong bad nangbieit bad ki kut beit ha ka jingkwah ban pynbor ba ki khambha ïa kiwei. Ha ka jingshisha ka jinghikai babha ka hikai ba kumno ngi dei ban ñiew ïa kiwei pat ki kham bha ban ïa ngi khnang ba kin lah ban khring ïa ki sha lynti jong ka jingbha. Ka jingñiew ïa kiwei ba ki khambha kam dei eh ba ngi pyndem noh ha ki hynrei kane ka ai lad ba ngin lah ban nangrung kham shapoh jong ka jingïatei bad wanrah ïa ka jingïasngewjan iwei ïa iwei pat.
Kat kum ka bor pyrkhat paidbah hi ym don kiba kwah ban pyntroiñ ïa kano kano ka jingpyrkhat babha ban tei ïa ka lawei jong ka ri bad ka Jaidbynriew hynrei kane ka long kaba eh ban pyntreikam ha ka jingim kaba man la ka sngi. Hynrei kawei na ki ktien phira kaba ju ong ‘to leh ha kiwei kumba phi kwah ba kiwei kin leh ïaphi’ ka long kaba donkam ban kynmaw khnang ba ngin long ki briew kiba pyrkhat jngai shuwa ba kin shim ïa ka rai pyrshah ïano ïano khnang ba kin poi sha ka jingthmu kaba bha da kaba siew kylliang da kaba bha ïa kaba sniew bad dei kane keiñ ka nongrim kaba ngin lah ban ïatei iwei ïa iwei pat. Namar la ïohi ba ha kine ki sngi ka pyrkhat pyrdaiñ hapdeng ki briew ka khim bha bad kim pyrkhat than eh ïa kiwei hynrei tang ban pynkiew skong beit ïalade. Kumta wat la ka jingsniew ka kham khring, hynrei ym dei ban ailad ïa ka bad dei ban tem ïa ka da ka jingbha. Lada shi sien ka jingpynphai kylla da kaba bha ia kaba sniew i kumba ka phiel, hynrei khlem pep ha kawe ki ka sngi ka jingbha kan jop beit ïa kaba sniew bad kane kan wanrah ïa ka jingkylla ha ka jingim jong ngi bad ruh ha ka imlang sahlang baroh kawei.
