25.60 klur mang ban tei thymmai ïa ka Ïawmusiang Market Complex ha Jowai

Jowai, Nohprah 13: U Symbud Myntri Rangbah ka sorkar jylla u Bah Sniawbhalang Dhar uba khmih ïa ka tnad Pynroi Sor ha ka sngi thohdieng ula buh ïa u mawnongrim ban sdang tei thymmai ïa ka ‘Ïawmusiang Market Complex’ bad ïa kane ka projek ba la tip kum ka (Re-Development of Ïawmusiang Market Jowai) yn tei ha ka jinglut kaba kot T.25 60 klur.
Ïa kane ka Ïawmusiang Market Complex jong ka Jaiñtia Hills Autonomous District Council (JHADC) yn tei thymmai hadien ba ladep leh ïa ka Re-Estimate, kaba ïadei bad ka Sanction Amount kaba la kot T.26 klur tam bad hadien ka jingkhot Tender ka la poi noh T.25.60 lak bad ka pisa baroh lada kheiñ lang bad kaba la dep pyntrei ha u snem 2012 lyngba ka pisa ba ïoh na ka Ministyr of DONER kaba kot T. 6. 33 klur bad na ka bhah pisa jong ka JHADC kaba T. 60 lak tam ka long T.32 klur tyngka.
La pyntip ba ïa kane ka projek la shimti da u Bah Pyrkhat Hinge kum u Contractor ha kaba la buh thong ban pyndep ïa ka jingpyntrei hapoh 24 bnai.
Kum ban shu phaidien, naduh ba la pynkynriah ïa kane ka Ïawmusiang sha Dongmihsngi Ladthadlaboh kane ka Ieawmusiang Market Complex ka la sah teng ha ka jingpyntrei la kumba 20 snem mynta.
Ha kane ka sngi la donlang da u MLA ka thaiñ u Bah Wailadmiki Shylla uba dei ruh u Chairman jong ka MUDA, u CEM jong ka JHADC u Bah Thombor Shiwat, u Deputy Commissioner jong ka West Jaiñtia Hills u B. S. Sohliya, u Secretary jong ka tnat PWD (Roads & Building) Bah B.W. Phira, ki MDC, ki ophisar, ki nongïalam shnong bad ki nongshong die jingdie.
U Bah Sniawbhalang Dhar ha ka jingkren ula ong ka jingurlong ban tei thymmai ïa kane ka iew baheh duh hapoh ka rilum Jaiñtia kan sa long ka jingmyntoi kaba khraw tam ïa ki nongshong ïew ba kin lah ban pynkiew shuh shuh ïa ka kamai kajih.
U la ai ruh ka jingïaroh ïa u MLA ka Jowai u Bah Wailadmiki Shylla uba la trei shitom ban dawa na ka Sorkar ban pyntrei thymmai noh ïa kane ka projek lyngba ka tnad PWD Building. Ha ka juh ka por ula kyntu ïa u Contractor ban pyndep ïa ka kam hapoh ka por bala buh.
U la pynsngew ruh ïa ki project bapher bapher ki ban la pyntrei hapoh ka Jowai naduh ki surok, ka Mini Secretariat, ka ïew Mall ha ka jaka ka Building jong ka DC ophis, ka madan ïalehkai Stadium bad ki jingtei ha ka kam jngohkai phyrthei hapoh Jaiñtia Hills nalor kiwei de kiba la sdang ban pyntreikam.
Hapoh kine ki 18 bnai ba la synshar ka Sorkar MDA-2 ki kam pynroi ba la wanrah sha ka Jaiñtia Hills ka la kot T. 2 hajar klur duna, ym tang ha ka District hynrei ha ka jylla hi baroh kawei da kaba wanrah ïa ka New City ha Mawdiangdiang ka ban ïa ryngkat kyrdan bad kiwei de ki jylla, ka Assembly ba thymmai kaba yn sdang noh ban shong jingïalang ha kane ka Dorbar Synrai ban wan nalor kiwei kiwei, la ong u Bah Dhar.
U MLA ka Jowai Bah Wailadmiki Shylla ula ong, “kane ka dei ka jingjop jong baroh lang ki nongshong shnong, da kaba kyrmen skhem ba ka kam dei ban kut tang ha ka jingbuh mawnongrim hynrei hapoh kine ki 24 bnai yn pyndep nadong shadong ïa ki jingdonkam.” U la pynsngew ruh shaphang ki projek bapher bapher ki ban sa pyntrei hapoh ka Constituency.
Ha kane ka sngi la buh mawnongrim kumjuh ïa ka projek ban pyntrei ïa ka surok Ïalong, Jowai, Madur Thymme, Niriang bad Mukhla ha ka jingjngai kaba (l=38.163 km) ha ka jinglut ba 50 klur bad kumjuh la plie ïa u mawnongrim jong ka Annexue Building Circuit House, Jowai.