Pynbna ka UDP ïa ka thup kyrteng ba nyngkong jong ki 26 ngut ki kyrtong MDC ha KHADC bad JHADC

Shillong, Nohprah 13 : Ka United Democratic Party (UDP) mynta ka Sngi Thohdieng ka la pynbna ïa ka thup kyrteng ba nyngkong jong ki 26 ngut ki kyrtong MDC jongka ki ban ïakhun ha ka election sha Khasi Hills Autonomous District Council (KHADC) bad Jaintia Hills Autonomous District Council (JHADC).
Na kine ki kyrtong ba la pynbna mynta ka sngi 16 ngut ki dei ki ban ïakhun ïa ka election sha KHADC bad 10 ngut sha JHADC.
Haba kren sha ki lad pathai khubor hadien ba la wai ka jingïalang jongka General Council ka UDP, u President ka Party u bah Metbah Lyngdoh u la ong ba ka party ka la pynkhreh bha na ka bynta kane ka election MDC sha kine ki ar tylli ki Autonomous District Council.
“ Mynta ka sngi ngi la pynbna ïa ka thup kyrteng kaba nyngkong jong ki kyrtong hadien ba la shong bishar bniah bha ïa kaei kaba la ai jingtyrwa da ki Constituency bapher bapher” ong u bah Metbah.
U la ong ïa ka thup kyrteng kaba ar yn ïaleh katba lah ban ïoh pynbna shwa ka Khristmas. U bah Metbah u la ong “ Ngin pyrshang ban pynïakhun kyrtong na baroh 29 tylli ki constituency ha KHADC bad 29 tylli ki constituency ha JHADC. Mynta ngi dang ap ïa ki kyrteng namar ki don ki constituency kiba ym pat dep shim rai ïano kin ai jingtyrwa sha ka party ban ai tiket”.
Ka UDP ka la rai ruh ban ym ïatrei lang bad no bad no ruh ha kane ka election MDC wat bad ka HSPDP kaba dei ka paralok ha ka Regional Democratic Alliance (RDA) ruh. U bah Metbah haba kren ha ka General Council u la ong ba ka Party ka la ïoh jinghikai na ki jingbakla ha ki por ba la dep khamtam eh ha ka election MP 2024.
Haba kylli halor kane, u bah Metbah u la ong “ Ha ka politik, lane hano hano la ka dei ha ka jingim briew ruh ngi hap ban ïaid lyngba kiba bun ki rai eh ram dam hynrei kine ki dei tang ki jinghikai bad ki jingjia ha ka jingïaid lynti jong ka jingim bad hadien kine kiei kiei baroh ngi hap ban jied ne ban shim rai bad pdiang ruh ïa ki jingshisha ba ki don ki jingeh ne ki jingïaleh ba phim lah ban jop bad ha kum kita phi hap ban pynleit jingmut bad ïakhun tyngeh beit”
Shuh shuh u la pynpaw ruh ïa ka jingsngew thikna ba ka party kan leh bha ha kane ka election MDC khamtam ba ka UDP ka la leh bun kiei kiei kiba bha ha ka por ba ka ïalam ïa ka Executive Committee (EC) ha KHADC.
“ Ka EC jong ngi ka la shim rai bun tylli ki mat kiba kongsan kiba la long aiñ mynta ban ïada ïa ki riti dustur tynrai jongka jaidbynriew bad mynta ka sngi ha ka General Council ngi la shim rai ban ngin leit sha ki paidbah halor kine ki mat ba ka party ka la pynurlong bad pyntreikam ha ka por ba ka ïalam ïa ka EC ha KHADC” ong biang u bah Metbah.
U la ong ruh ba kumba long mynta ka lyer VPP kan ym don jingktah ei ei ruh ha kane ka election MDC ban wan.
“ Yn pynshong nongrim hangno lada ki briew ki ong ka party B ne party A kan sar ïa ka election ha kaei ka nongrim? Ngi ruh ngi lah ban kob ba ka UDP kan sar ha kane ka kynti halor ki nongrim ba ka la treikam bha ha ka por ba ka synshar ha KHADC bad mynta ka sngi ngi la phai dien bad bishar bniah ïa kine ki mat ba ka UDP ka la leh bad nga tip shai ba ki paidbah kin sa bishar bniah ïa kine ki kam ba ka party ka la leh. Nga thikna ba ki paidbah kin leh ïa kata namar wat kito kiba la kylla jingmut mynshwa ruh mynta nga tip shai ba kin kylla bamut bad phai dien biang bad ai ka jingkyrshan ba pura ïa ka UDP ” ong u President ka Party.
Kine ki 16 ngut ki kyrtong sha ka KHADC ki long : Desmond KL Mawlong- Nongthymmai, Mitchel Wankhar- Laban-Mawprem, James Ban Basaiawmoit- Mawkhar-Pynthorumkhrah, Auguster Jyrwa -Jaiaw, Titosstarwell Chyne- Sohra, Barikupar Synrem- Shella, Matthew Beyondstar Kurbah- Mawphlang-Diengiei, Naphistista Marwein- Umroi, Mawhati-James Sylliang, Eddie G Karbani- Umsning, Nongpoh-Balajied Ranee, Pius Marwein- Largrin, Jessland Roy Nongsiej- Mawkyrwat, Sranly Rongrin- Mawshynrut, Equator Nongrang- Mairang-Nongkhlaw, Jambor War-Pariong- Mawthadrashain.
Ki 10 ngut ki kyrtong ki ban iakhun sha ka JHADC ki long Lomris Lyngdoh-Muthlong-Sohkynphor, Joinriwell Pyrtuh -Bataw Lakadong, Lasky Rymbai -Tuber-Wapung-Shnong, Finelynes Bareh-Rymbai-Khliehriat, Rollinson Dkhar-Sutnga-Narwan, Eleazer C Dkhar -Shiliangmyntang, Winning Gustard Sungoh-Mookaiaw, Fernando Sumer-Saphai, Riio Sten-Barato-Mukroh, Marki Mulieh- Jowai-North.