Shillong, Nohprah 13: Sa tang katto katne por jong ka jingpynlong ïa ki elekshon sha ki Autonomous District Council, ka seng Congress ha ka sngi Thohdieng, ha kaba khatduh, ka la wengnoh ïa ka jingkyrshan napoh ka kynhun jong Khasi Hills Democratic Forum (KHDF) kaba la ïalam da ka National People’s Party (NPP) ïa ka executive committee (EC) ha Khasi Hills Autonomous District Council (KHADC).
Katkum u nongïalam PP ka Congress hapoh KHADC u Bah Pynshngainlang N Syiem u la aiti ïa ka shithi iehnoh kam kum u deputy chief executive member (Dy.CEM) bad u Bah Ronnie V Lyngdoh kum u Chairman ka Advisory Committee ha KHADC.
Baroh artylli ki shithi iehnoh kam bad ka shithi ba ki la wengnoh ïa ka jingkyrshan ki la aiti sha u khlieh ka KHADC bad u chairman jong ka KHDF u Bah Pynïaid Sing Syiem.
Haba kren sha ki lad pathai khubor u Bah Pynshngainlang N Syiem u la ong, “Ngin ym don lad shuh da kumwei pat hynrei ngi hap ban wengnoh napoh ka EC ka KHDF. Naba ki nongïalam ka party jong ngi bad ki nongtrei ki la shem ba kam long kaba biang ban ïatreilang bad ka NPP ha KHADC, kumta ngi la rai ban burom ïa ki jingai jingmut jong ki.”
U la pynkynmaw ba ki nongïalam ka party bad ki para nongtrei ka seng ki la banjur halor ka jingdon jong ka Congress hapoh ka KHADC bad ki la kyntu ba dei ban wengnoh mardor ïa ka jingkyrshan ïa ka EC ba la ïalam da ka NPP naduh ka 20 tarik u Nailur ha une u snem. Kumjuh ki president jong ki district congress committees (DCCs) dangshen ki la phah ruh ïa ka shithi sha ka AICC ba kan tuklar halor ka jingpynslem jong ki MDC ban mihnoh napoh ka EC jong ka NPP ha KHADC.
Haba kylli ïa ki daw ba shalyndet jong ka jingslem ban weng ïa ka jingkyrshan na ka EC ka NPP, u Bah Syiem u la ong, “Naduh ka sngi ba nyngkong ngi la rai ban ïatreilang bad ka NPP ha KHADC, naba ngi la kren da kaba shai halor ki kam kiba ïadei bad ki kam kiba kongsan kiba dang ïaid kum ka jingtyrwa ban wanrah jingpynkylla thymmai ïa ka khyrnit kaba 6, nangta ban pynkupbor ïa ki kam shnong kam thaw. Kine ki kam mynta ki dang ïaid sha ka jinglah ban pyndep. Namar kata kam long kaba biang ïa ngi ban kyrkieh shim ïa ki rai naba ki don ki kam, kaba ngi dang donkam shisha ban ïatreilang na ka bynta ka bha ka miat jong kiba bun balang khamtam ki trai ri trai muluk. Kumta ka la don ka jingpynslem.”
Haba ïaroh ïa ka EC ba la ïalam hapoh ka KHDF kaba la lah ban ïoh bun ki jingmynjur tang hapdeng ka por kaba lyngkot u bah Syiem u la ong, “Ngi la lah ban pyndep bad ban ïapynbeit ïa kiba bun ki kam kiba ïadei bad ki kam shnong kam thaw, na ka bynta ki seng Longkmie bad ki seng samla, nangta jong ki seng kur, kumjuh ruh haba ïadei bad ka jingtyrwa ban wanrah jingpynkylla ïa ka khyrnit kaba 6, bad dangshen, ngi la kynduh ïa u Adviser jong ka Ministry of Home Affairs ban ïakren bad ban ai jingmut. Kine ki dei ki daw balei ngi slem ban shim ïa ka rai ban weng ka jingkyrshan napoh ka EC.”
Shuh shuh u Bah Syiem u la ïathuh ba ki don ki jingai jingmut kiba bha ba la ai da ka EC ha kaba ïadei bad ka jingtyrwa ban pynkylla ïa ka khyrnit kaba 6 jong ka riti synshar jong ka ri India.
“Ngi ai jingmut ba u Lat un ym lah ban thung ïa uno uno u MDC ba shu thung khlem da ïoh ka jingmynjur jong ka district council. Ngi la banjur ba ka jingthung ïa ki MDC ba shu thung dei ban ïoh ka jingmynjur napoh ka district council. Kumta ngi la ïada ïa ka bha ka miat jong ka district council bad ki briew jong ngi,” u la ong da kaba bynrap, “Ngi la pyrshah ruh ïa ka jingtyrwa ban pynrung ïa ka unrepresented tribes. Ngi la ong ba dei ban don beit tang arngut ki MDC ba shu thung, ha kaba uwei na ki yn dei da ka kynthei bad ïa ki kyrteng jong ki dei ban mynjur da ka district council.”
“Haba ïadei bad ka pla tyngka, ngi la ong ba dei ban long katkum ka jingmynjur jong ka district council. Shuh shuh ki bor ban pynlait ïa ki aiñ ka sorkar pdeng kaba kynthup ïa ka CAA, halor kane, ngi la ong ba ïa kane ka bor dei ban pynphai biang sha u Lat bad ym dei sha ka President na ka bynta ban pyllait ïa ki aiñ ka sorkar pdeng. Lada u Lat ka jylla u lah ban pynlait na ki aiñ jong ka sorkar pdeng, kan long ka jingkyrkhu kaba khraw,” u la bynrap shuh.
Ha kawei pat ka liang, une u nongïalam ka Congress u la ong ba ka rai jong ka party ban weng ïa ka jingkyrshan kan ym don ka jingktah halor ki mat treikam jong ka seng ha kine ki elekshon MDC ban sa wan ha KHADC.
“Kan ym ktah ïa ki elekshon naba ka shong ha ki rukom treikam jong ki nongïalam. Lada ki MDC Congress ki la lah ban leh haduh katne tang hapdeng ka por kaba lyngkot, ki briew ha ka jingshisha ki la dei ban dang khmih lynti shuh shuh na ngi bad ngin sa leh ïa ka kam kaba khambun,” u la ong.
Sa kawei pat ka jingkylli, u Bah Syiem u la jubab da kaba ong ba ka Congress kan shong noh hapoh ka liang pyrshah bad ka long kaba kloi ban leh ïa la ka jong ka bynta hapoh ka Ïingdorbar KHADC.
“Ngin sa leh bun ki kam ba ïatei kum ki MDC hapoh ka liang pyrshah. Hynrei lada kim lah ban trei bha, ngin long kiba kloi ban pyrshah ïa ki,” u la ong.
“Ka rai jong ngi ban weng ïa ka jingkyrshan kan ym ktah ïa ka EC naba ki dei kiba dang bun paid hapoh ka ïing. Ki dang don kumba 16 ne 17 ngut ki dkhot hapoh ka KHDF,” u la kam.
