SHILLONG, Nohprah 14: Hadien ka jingplie ïa ar tylli ki madan siang dewbilat (Concrete Pitch-ban pyndonkam ha ka ban ïalehkai kriket) dang shen ha Smit bad ha Thynroit, ka East Khasi Hills Cricket Association (EKHCA) ha ka 14 tarik Nohprah, 2024 (sngi Saitjaiñ) ka la ïoh ban plie sa kawei ka madan Concrete Pitch ha Mawphlang.
Ka jingthmu da kaba plie bad pynïoh ïa kum kine ki madan ka long ban pynkhlaiñ bad kyntiew ïa ka jingïalehkai kriket ha ki thaiñ Nongkyndon bad ba ki khynnah kiba sngewtynnat bad kiba thrang ban ïashimbynta ha kane ka jingïalehkai kin ïoh ban kilanmet bad ban saiñdur ïa la ka jong ka sap.
Ha kane ka sngi ba plie ïa ka madan la ïadon ryngkatlang u Dhruva Thakuria – Honorary Treasurer jong ka Meghalaya Cricket Association, nangta u Bah Lamphrang Blah MDC ka thaiñ lem bad u Rangbah Shnong – Bah M. Dohling kiba la ïaroh ïa ka synjuk kaba la pynroi shuh shuh ïa ki jingtei na ka bynta ki jaka nongkyndong ïa kaba kin lah ban nang sei shibun ki nongïalehkai kiba lah ban mihkhmat ïa ka Jylla.
