12 hajar vote ngi la ïoh lypa ha Mawkyrwat lada kheiñ lang ka NPP bad Congress: Dr. Ampareen

By Mawphor News Desk On Mar 15, 2024

Mawkyrwat, Lber, 14: Ka National People’s Party (NPP) jong ka Mawkyrwat Block mynta ka sngi ka la ïoh ban pynlong ka jingïalang kaba tang ki nongïalam ha Mawkyrwat ryngkat ka jingkren diang sngewbha ïa ki briew kiba wan rung thymmai na ka Indian National Congress (INC) hapoh ka jingïalam jong u bah Carness Sohshang u MDC ka Mawkyrwat Constituency.
Kane ka jingïalang ka long ruh kum shibynta ban pynshai ha ki paidbah nongkyshan jong ka NPP Mawkyrwat Block ba naduh mynta ka sngi hapoh ka NPP ym don shuh shuh ar ngut ki nongïalam kumba ka mih ba ka don ka NPP jong u bah H.S. Diengdoh ne NPP jong u bah Carness Sohshang hynrei mynta ka la don beit tang kawei ka kyrteng.
Ka kong M. Ampareen Lyngdoh, Myntri jong ka tnad ka koit ka khiah ka Jylla Meghalaya bad kum ka kyrtong jong ka NPP na Shillong Parliamentary Seat haba kren ha ka jingïalang ka la pynpaw ba lada yn kheiñ lang ïa ki nongkyrshan na ka NPP ba la don lypa bad kiba dang wan na ka INC, ka 12 hajar vote ka la don lypa napoh jong ka Mawkyrwat Constituency bad ïa kane ki da ïateh ruh ïa ka soskular ryngkat ka jingpyni da kaba ki nongkyrshan ki la rah ïa ki kti jong ki. Namarkata, ka la ong ba kaba donkam mynta ka long ba ka jingïatylli jong ki nongkyrshan na kylleng ki shnong ban ai ka vote sha ka NPP ka la biang pura.
Ka la ong ruh ba ka jingleit na kawei ka shnong sha kawei pat kam dei eh tang ban kren shaphang ka elekshon, hynrei ka dei ba la i donkam ba ha ka ri Khasi/Jaiñtia ban sei madan ïa kano kano ka kynhun saiñ pyrthei ka ban pynïatylli biang ïa u paidbah haba jia kum ka seng Congress. “Ban long MP kam long kaba suk, mynta nga kaba phong ïa ka juti nga sngewthuh shai haei u prek u dung”, ong ka kong Ampareen bad ka sngewburom pat ba ha kine ki shi bnai shiteng kiba la dep kane ka lynti ïaid jong ka ka la nang ïalam shuh shuh sha ki kyndong ki kynshrot jong ka Shillong Parliamentary Seat bad haduh 450 tylli ki shnong ka la dep ban rung.
“Kat nang mih ki sngi, ka jingkhia jong ka jingkit bad ka jingud jingnam jong u paidbah ka la nang sawa ha nga bad ïa ka kam MP hi lada u ne ka kyrtong kim dei ha juh ka tyllong party kaba bit kaba biang ne ha ka sorkar ka eh ban pynurlong ne weng ïa ki jingeh”, ong ka kong Ampareen. Namarkata, ka la kyrpad ba lada ki paidbah ki pynjop ïa ka NPP lyngba jong ka kum ka kyrtong, kita ki kam pynroi kin sa wan ha ki shnong ki thaw. “Haba nga leit na kawei ka shnong sha kawei pat ngam ju don por ban thnum hynrei nga ïaid beit ban trei na ka bynta ka bha ka miat jong u paidbah bad ong ba tang da ka jingtrei shitom hi yn lah ban pynpoi sha ka thong jong ka jingjop ym da ka pisa ka ban shu thied.
Ka la kren ruh ba ha kine ki khyndiat sngi ha ka jingleit ban ïa kynduh ïa u CM, ka ong, “Phi la kyntu ïa nga ban long ka kyrtong na ka NPP, mano ban peit ïa ki jingeh jong ki paidbah lyngba ki shithi ba ki paidbah ki la phah ban ïoh ki lad jingïarap kiba pher bapher”, ong ka kong Ampareen ïa u Chief Minister bad khlem jingartatien 2 klur 25 lak u CM u la mang pisa na ka bynta ki jingdawa jong ki paidbah.
Ka kong Ampareen ha ka jingkren jong ka ka ong ruh ba ka ‘Politics’ hi ka dei ka drama kaba khraw bha, namar kaei kaba ki ïa ju ïa kren ha ki rynsan tip ki da ïa kynmaw ne ki ïoh sngew ïa kaei kaba u thylliej u kren ne lah ban ong ba u thylliej khlem shyieng bad kam dei ban long kumta namar kane ka kam ka dei ka kam kaba kyntang bad lada kwah ban long MP ban leit kren beiñ ïa ki briew kam long ka lynti kaba dei hynrei ka donkam pat ka jingïatylli bad ka jingtrei shitom jong baroh ki nongkyrshan ban pynpoi sha ka thong ïa ki kyrtong.
Kiba ïadon lang ha kane ka sngi ki long u bah H.M. Shangpliang, u nongaibuit jong ka tnad pule puthi ka jylla, u bah Kitborlang Nongrem, State President ka NPYF, u bah Hamletson Dohling, Working President jong ka NPP, ka Dr. Jasmin Lyngdoh, State President jong ka NPP Women Committee, u bah Lamphrang Blah, MDC ka Mawphlang Constituency, u bah Pynïaid Syiem, CEM ka KHADC, bad kiwei de.