50 tylli ki snem la ïaid hynrei ka longthik kum ka Pynthor ba shu ieh shrah: HYC West Khasi Hills

Nongstoiñ, Risaw 28: Ka Hynñiewtrep Youths Council West Khasi Hills District ka dap da ka jingkmen ïa ka jingkynjoh jong ka West Khasi Hills District mynta 50 snem ha ka ban ïoh ïa ka District kaba pura. Lyngba ka West Khasi Hills District la ïoh ban pynkha ïa ki ar tylli ki District ka South West Khasi Hills bad ka Eastern West Khasi Hills District. Hynrei, sngewsih ba kat haduh 50 tylli ki snem ba la kynjoh ha ka 28 tarik Risaw 2026, pynban shu sahdien lut ha baroh ki liang, khlem ïapher ei ei bad ka pynthor ktieh ba shu ieh shrah.
Na ka liang u samla Wanteibok Lyngdoh General Secretary ka HYC West Khasi Hills u la ong, “Haba phai ha kaba ïa dei bad ka roi ka par kum ka District, ka dei ka District kaba hiar tam ha kiba bun ki liang la ha ka jingdon ki Office kiba paka kim don. Bun ki office kiba don ha District ki dei ki office kiba hap ban shu shongwai khlem ki office treikam kiba biang. Lada dei ha koit ka khiah ruh duna bha ïa ka jingdon ki Doctor specialist ki Nurse lane wat ki tiar sumar kiba biang ha ki Hospital, PHC ne ki Sub Centre”.
“Haba phai ha ka pule puthi ruh ngi duna bha ym don ïa ki College sorkar bad ym don ki College kiba ïadei kyrpang bad ka Science Stream. Ym don satia ki school ban hikai ha kaba ïa dei bad ka juk kaba mynta ban shna kam lane ïoh kam. Ngim don ruh ïa ka Polytechnic College. Nangta haba phai ha ki kam ïalehkai ruh ngi hiar bha namar ka jingbym don ïa ki stadium ïalehkai kiba biang ne ki madan ïalehkai athletics, lane ki madan ïalehkai Football artificial turf kiba ïa dei bad ka juk kaba mynta”.
“Ka kam jngohkai pyrthei kaba dei ka lad kamai katkum kane ka juk ruh kaba long shibynta ban ai kam ïa ki trai muluk, hynrei kane ruh kam da kiew hapoh ka thaiñ. Ha ka liang ka rep ka riang ruh kumjuh ka hiar bha lane kiba ri jingri namar ka jingbym ïa ki policy kiba biang bad ka jingbym don ïa ka ïew ka hat. Kiba bun ruh ki shnong hapoh ka District ki bym pat don ïa ki surok kiba biang ki hap ban ïaid kjat da ki kynta ban ïoh jingïarap lane ban leit shim dawai”.
“Ka Seng ka kwah ba ka sorkar ka dei ban phaikhmat kyrpang sha ka District jong ngi. Katne tylli ki snem ngi lah ïaid ngim kwah ba ka District jong ngi kan dei kaba sahdien sah bad kaba shah kyntait. Ha ka jingshisha ka District jong ngi ka dei kawei ka District kaba pynmih shibun ka Revenue ïa ka sorkar, katba ha ka roi ka par pat ngi duna ban ïoh”, ong ka kyrwoh na u Samla Wanteibok Lyngdoh General Secretary Hynñiewtrep Youths Council West Khasi Hills.