Palat 20 snem shu sahkut ka jingpyntrei ïa ka jingkieng hapoh sor Nongstoiñ

Nongstoiñ, Lber 14: Ka long kaba jah burom namar wat hapoh sor ruh ym lah ban trei pyndep kumba dei ban long, katno tam sha ki jaka ba kham kyndong lei. Ka jingkieng ba donkam ha wah Phodthre kaba don hapoh jong ka sor Nongstoiñ, kaba dei ka jingkieng ban pynïasoh ïa ka surok Irrigation sha Mawrusyiar-Tiehsaw, ka la sahkut khlem lah ban shna pyndep ïa ka wat hadien ki 20 snem tam ba la sdang ban shna ïa ka.
Kum ban shu pynkyn-maw ba kane ka jingkieng kaba jrong kumba 18.75 metar, la thmu ban shna khnang naduh u snem 2001 shuwa u 2002 u snem ba ka don ka jingïaseng KJP Assembly jong ka Balang Presbyterian ha New Nongstoiñ. Hynrei kaba lyngngoh ka long ba naduh utei hi u snem haduh mynta ym shym la lah ban pyndep shuh bad la ïohi tang ïa uwei u païa ba la shna da u Contractor ruh khlem pyndep shuh.
Ka jingbym lah ban pyndep shuh ïa kane ka jingkieng, ka la wanrah ïa u dak jingkylli u ba heh bha na kiba bun ba lang ba hato ka tnad PWD ka leh aiu baroh shikatta ban pyndep ïa kane ka jingkieng na ka bynta ka bit ka biang ki paidbah. Ha ka jingshisha ka dei ka jingkieng kaba donkam haduh katta katta na ka bynta ki paidbah ka sor Nongstoiñ, namar ka dei kaba pynïasoh ïa ka shnong Upper New Nongstoiñ bad ka shnong Tiehsaw.
Ka jingdonkam ka long khamtam eh lada don ka jingdheng kali ha Assam oil Petrol Pump shaduh Upper New Nongstoiñ ter ter, lane lada don ka jingdheng kali nadong Spengthaw-langlah sha New Nong-stoiñ, kane ka jingkieng kan ïarap ban pyllait na ka jingsahkut ki kali. Nangta kan ïarap ruh ïa ki khynnah skul kiba dei ïaid lyngba kane ka wah ban kam na shilliang sha shilliang.
Ha kaba ïa dei bad kane ka bynta, u nongthoh khubor haba ïa kren bad u Headman jong ka shnong Tiehsaw Bah Moonshine Dkhar, u la ong ha u snem 2018 u ex MLA ba don burom jong ka Nongstoiñ Bah Mac Millan Byrsat, ha ryngkat u Superintending Engineer bad Executive Engineer jong ka tnad PWD, ki la poi sha ka shnong Tiehsaw na ka bynta ka jingpynbha ia ki surok jong ka sor Nongstoiñ.
U la ïathuh ba na ka liang ki bor shnong ruh ki la sakhi lang ïa kata, ha kaba na ka liang u MLA u la kyntu ïa ki heh jong ka tnad PWD, ban buddien ïa ka kam kaba ïa dei bad katei ka jingkieng kaba la shu sahkut khlem lah pyndep shuh da ki phew snem.
Hynrei, ka shu long ka jinglyngngoh sha ki paidbah jong ka thaiñ Nongstoiñ, ba haduh mynta ym pat iohi dak ei ei ba la sdang ban trei bad pynbha pat. Kumta na ka liang ki paidbah jong ka sor Nongstoiñ, ki kyntu sha katei ka tnad ba kan sngewbha ban pynsted katba lah ïa ki jingdonkam baroh, namar katei ka jingkieng ka long kaba donkam haduh katta katta na ka bynta ka sor Nongstoiñ baroh kawei.