Ujor ejahar ka KSU ïa ki bar jylla kiba thmu leit trei ha Company Star Cement khlem ki dulir ba biang

Khliehriat, Lber, 14: Ki dkhot jong ka Khasi Students Union Narpuh Circle, hynnin ka miet jong ka 13 tarik u lber ki la beh bad ktnong ïa kawei ka bos nigh super bad lap ba katei ka bos ka la rung beit shapoh company Star Cement ha Lumshnong, katei ka bos ka la kit shibun ki briew kiba dei ki bar jylla, hadien ba ki dkhot ka seng ki la tohkit ki la lap ba kitei ki bar jylla ki mut ban leit trei hapoh company star cement khlem da biang ki kot ki sla.
Khlem da shim ïa ka aiñ ha kti, ki nongïalam bad ki dkhot jong ka KSU Narpuh ki la leit ban aiti noh îa ktei ki bar jylla ha kti ki pulit bad buh ruh da ka ejahar ha Lumshnong Police Station.
U President jong ka KSU Narpuh Circle, u bah K.S.Suchiang u la iathuh ba kitei ki hynriewphew ngut bar jylla ki la wan da ka bos night super kaba don u registration number ML 05L7887 bad ong ba kitei ki briew ki wan na Guwahati da kaba thok ïa ki nong ap khyrdop ha Umling check gate bad ong ba kin leit sha Silchar, hynrei hadien ba ka seng ka la ioh jingtip na ki para dkhot kiba na Ri Bhoi bad kumjuh ruh lyngba ki dkhot kiba na Khliehriat Circle, na ka liang ka seng ka la pynap shrip ïa katei ka bos ha surok NH -6 ha lad ban leit sha Amrit cement bad hapdeng ka miet ha ka por kumba 9.30 baje mynmiet ki dkhot ka seng ki la buddien ïa ka bos bad lap ba ka bos ka la rung beit shapoh Company Star Cement ha kaba kiba ap pahara ha ki khyrdop ka Company (Gate-1) ruh ki khlem bat satia ïa ka bos. Mar kumta hi ki dkhot jong ka KSU na Narpuh ruh ki la rung lang shapoh Star Cement bad dei hadien ba la iaid lait ïa ka khydop Gate No 1 jong ka Company ki dkhot ki la iohlad ban khang kdong ïa ka bos bad phah hiar ïa baroh kiba shong hapoh bos.
“Haba la tohkit bha la shem ba kane ka bos Night supper ka la thok bunsien bad don ruh kiba iathuh ba dang myn ha ka miet jong ka 11 tarik Lber 2024 ruh kane ka juh ka kali (bos) la suba ba kit ïa ki bar jylla, ngi la ap bad peitngor hynrei ngi khlem lap dien namar ym lah shuh ban ap baroh shi miet. kine ki bar jylla ki dei kiba wan na Bihar bad na Assam, hynrei kim don ïa ka Work permit ba kin trei hangne hapoh ka jylla jongngi kumta ngi la leit bad aiti noh ha ki pulit Lumshnong ban leh katkum ki kyndon aiñ bad ruh ban pynphai dien noh ïa ki na ka jaka ba ki wan,” ong u bah K.S.Suchiang.
La ong ruh ba na ka liang ka KSU Narpuh Circle, kan iai long peitngor beit ïa ka rung ka mih ki briew kiba na bar jylla bad ki bar ri ruh kumjuh, ha kajuh ka por ka seng ka kyntu ïa ki ba ap ha ki khyrdop talasi mynder bad kiwei kiwei ki khyrdop ruh ba ki dei ban da peit bad bishar bha ïa ki kot ki sla jong ki briew kiba na bar kiba wan rung shapoh ka jylla.