Yn seng ïa ka Task Force na ka bynta ki kam khyndew-shyiap ha ki jylla ka thaiñ shatei lam mihngi

Ha ka National Conference halor ka “Land Governance in North Eastern States” ba la pynlong ha ka 3 bad 4 tarik u Jymmang, 2023 ha Guwahati, ki Territorial bad Autonomous District Council ha ki jylla Assam, Tripura, Mizoram bad Meghalaya ki la ong ba ka jingpynkylla digital ïa ki kot ki sla kiba ïadei bad ki jaka puta ka long kaba donkam bha na ka bynta ka roi ka par. Ïa ka National Conference la pynlong da ka Lal Bahadur Shastri National Academy of Administration, Mussoorie bad ka tnat Land Resources ha ka jingkyrshan jong ka tnat Revenue jong ka Sorkar Assam. U Ajay Tirkey, Secretary ka tnat Land Resources u la pynïaid ïa kane ka National Conference. U Sonmoni Borah, Joint Secretary ka tnat Land Resources; u Gyanendra Dev Tripathi, Principal Secretary, Revenue, Sorkar Assam; ka Anandhi, Deputy Director, Lal Bahadur Shastri National Academy of Administration, Mussoorie; u P.V. Rajasekhar, Additional Surveyor General, Survey of India; ka Mridula Singh, Sr. Social Development Specialist, World Bank bad kiwei kiwei ki ophisar ki la ïadon lang. Ki nongmihkhmat na ka Bodoland Territorial Council, Karbi Anglong Autonomous District Council, Dima Hasao Autonomous District Council (kiba ha Assam); Tripura Tribal Areas Autonomous Council, Tripura; Lai Autonomous District Council, Mizoram; Khasi Hills Autonomous District Council, Garo Hills Autonomous District Council, Jaiñtia Hills Autonomous District Council (kiba ha Meghalaya) ki la ïashim bynta ha kane ka National Conference.
Ki jingïamir jingmut ha kane ka National Conference kaba nyngkong eh ki kynthup ïa ki rukom treikam ha ki jylla mynta bad ka rukom pynthymmai ïa ka jingbuh ïa ki jingtip shaphang ki jaka puta, ka rukom peit bad pynïaid ïa ki kam kiba ïadei bad ki jaka puta bad sa kawei ka bynta halor ki aiñ bad ki dustur tynrai, ki rukom treikam mynta bad ki sienjam ba thymmai bad ruh ka bynta jong ka Survey of India ha ka jingpynthymmai ïa ka rukom buh jingtip shaphang ki jaka
puta.
Katba ki kam pyndonkam da ki kor computer bad ki lad digital ban buh jingtip shaphang ki jaka puta ki la ïaid shaphrang ha katto katne ki bynta jong ka Assam, la shem ba kane ka dang duna bha ha ki jaka ba hap hapoh ka Bodoland Territorial Council, Karbi Anglong Autonomous District Council bad Dima Hasao Autonomous District Council. Dang thaw ïa ka Bodoland Land Policy bad la kyrmen ban pyndep shen ïa kane. Ka khana samari ha ki jaka Karbi Anglong ka dei ka bym pat leh. Katba ka Dima Hasao Autonomous District Council ka la pdiang ïa ka aiñ Assam Land Regulation Act, ki don ki jaka kiba heh ki bym biang u pud u sam bad kumta la sngew ba ka long kaba donkam bha ban don ka jingpeit bniah ïa kine ki jaka. Ka Tripura Tribal Areas Autonomous Council ka don phra tylli ki Distrik bad kumba 10,000 sq.km. hapoh ka Sixth Schedule bad 10 tylli ki aiñ tynrai. Ha ki jaka Lai Autonomous District Council jong ka Sixth Schedule, la sngew ba dei ban don ka jingpeit bniah ïa kine. Ha ki jaka ba hap hapoh ka Khasi Hills Autonomous District Council jong ka Meghalaya, ki jaka puta ki dei kiba long trai da ki briew. Ka Garo Hills Autonomous District Council ka don ka rukom treikam ha kaba ka District Council ka ai ïa ki patta na u snem sha u snem. Katba ka Jaiñtia Hills Autonomous District Council, Meghalaya ka bud ïa ka Meghalaya Land Survey and Records Preparation Act 1980.
U Ajay Tirkey, Secretary ka tnat Land Resources u la ai jingïaroh ïa ki jingpyrshang jong ka Anandhi, Deputy Director, LBSNAA ban pynlong ïa kane ka Conference bad u la pynshai ba katba ka jingkwah jong ki Autonomous District Council ha ka thaiñ shatei lammihngi ban pynkylla digital bad pynthymmai ïa ki rukom buh jingtip shaphang ki jaka puta ka dei ka sienjam shakhmat, yn shim lut ïa ki lad ban ai jingkyrshan ïa ki Council katkum ki kyndon ka Riti Synshar bad ki aiñ kiba don. Kum ka sienjam na ka bynta kane, ka Bodoland Territorial Council ka la tyrwa ban don ka jingpynkylla digital bad pynthymmai ïa ki rukom buh jingtip shaphang ki jaka puta bad ka tnat Land Resources ka la ai jingmynjur ïa kane.
U Secretary ka tnat Land Resources haba u la peit ïa ka jingïar jong kane ka kam kaba hap leh ha ki jylla ka thaiñ shatei lammihngi u la ïathuh ba yn seng ïa ka Task Force na ka bynta ki kam kiba ïadei bad ka khyndew ka shyiap ha ki jylla ka thaiñ shatei lammihngi da ka jingioh jingmynjur na ki bor kiba dei ban peit ïa kane bad ruh hadien ka jingïakren bad ki Autonomous District Council. U Sonmoni Borah, Joint Secretary u la kyntu ïa ki Autonomous District Council ba kin phah ïa ki jingtyrwa jong ki na ka bynta ka jingpynkylla digital bad ka jingpynthymmai ïa ka rukom buh ïa ki jingtip shaphang ki jaka puta hapoh ka Digital India Land Records Modernization Programme(DILRMP). U la ai jingsngewnguh ruh ïa ka Anandhi, Deputy Director, LBSNAA bad Principal Secretary, ka tnat Revenue jong ka Sorkar Assam kiba la pynlong ïa kane ka National Conference.