Shah khang lynti kiba pyrshah ia ka Public Hearing bad shah pyn phai dien noh ha ki bor pulit ha shnong Bataw

Khliehriat Jymmang 10: Ha kaba ïadei bad kiwei pat kiba mut ban leit sha ka Public Hearing, kiba ieng pyrshah ïa ka Myntdu Leshka Project Stage-II, u Secretary Elaka Lakadong, u bah Eshrom Mynthlu, u la pynpaw bad ong ba ki paidbah ka elaka baroh ki ieng ban pyrshah ïa katei ka project jong ka tnat MeECL bad ïathuh ruh “Nga sngew phylla ban ïathuh ba balei ka sorkar kam shym kynthup lang ïa ki shnong baroh kiban sa shah ktah? Ki dei ki shnong kiba jngai tang kumba 500 haduh 800 mitar ka jingjngai na kane ka dam ne ka project ban shna ïa Power houese bad ki don haduh san tylli shnong hapoh ka elaka Lakadong ki ban sa shah ktah jur lada shna ïa kane ka project bad kita ki shnong ki dei ka shnong Borghat, Natbor, Demlakiang, Bri Khynriam,Kwator, ki dang bun ki mat jingdawa ba ka sorkar ka dei ban leh eiei na ka bynta kitei ki shnong ruh”
U la ong ruh ba ki paidbah kiba pyrshah ki dei ban don lang khnang ha kane ka jaka pynlong jingïalang, ba kin ïoh sngew ba kaei ba ka sorkar kan pynsngew ïa ki jingïohnong bad ki jing duhnong jong ki paidbah .
“Mynne shwa ban rung hangne shwa ban rung sha shnong Bataw, la pynsangeh ïa ki paidbah da ki pulit bad la pynphai noh ïa ki khlem ïohlad satïi ban rung sha kane ka jaka ba long jingïalang”.
Ki paidbah ki la ïathuh ruh ba hadien ka jingïakren bad ki bor ka aiñ bad kyrpad ïa ki ban shah ban leit sha kane ka public hearing, hynrei ki pulit bad ki don ruh ki riew paidbah ki ba la khanglad bad ki la ailad tang ki nongïalam jong ka Elaka Lakadong bad ïa ki waheh shnong ban rung sha ka jaka ba pynlong Public Hearing katba ki paidbah ki hap ban shu leit phai ïam rem sha ki shnong jong ki bad kynthoh ruh kane ka jingleh ne jingkhanglad ka dei na ka daw ba ka lah ban don kaei kaei re kaei sha lyndet, la ong ruh ba la phah ap pahara bad khanglad ruh da ki briew kiba la kah durkhmat bad tap jaiñ iong kiba la ap lypa naduh ka por 8 baje mynstep haduh 11baje mynsngi ha ki surok ban rung sha ka jaka long jingïalang ha shnong Bataw.
La ong ruh ba ka la don ka jingtalasi ïa ki kot kali bad ki Driving licence jong ki nongniahkali kiba thmu ban leit sha kane ka public hearing.
U Secretary Elaka Lakadong, u pynrem jur ïa kane ka jingleh ki don bor jong ki briew ka aiñ bad ong ba kane ka dei ka public hearing ha kaba ki paidbah ki lah ban wan sngap bad pynsngew ïa kiei kiei kiba don, hynrei ki paidbah jong ki shnong na poh jong ka Elaka Lakdong bad kumjuh na ka shnong Suchen Pyllun bad kiwei ki riew paidbah ruh ki la shah khang lynti noh mynhynne ka sngi ha ki pulit ha Bataw.