Dawa u Bah Bindo ban aiti sha ki pulit ïa ki BSF ba siat ïa u Bah Roningstar

0

Shillong, Jymmang 10: U Co Chairman jong ka State Law Commission uba dei ruh u MDC ka KHADC u Bah Bindo M Lanong ha ka sngi balang u la dawa ba ki BSF ki dei ban aiti sha ki pulit ka sorkar jylla na bynta ka jingtohkit halor ka jingsiat ïap ïa u Bah Roningstar Nongkynrih.
Ha ka shithi ba u la phah sha u Director General u Bah Bindo u la ong ba kane ka kam be-aiñ kaba ki BSF ki leh ki dei ban shah pyngngat ha ka Section 302 jong ka IPC bad dei ka kamram ki pulit ka sorkar jylla ban shimti ïa kine ki BSF ba siat ïap ïa u Bah Roningstar,
U la ong ba kane ka jingleh ki BSF ka la ktah jur ïa ka ïing ka sem une u rangbah uba don arngut ki khun kiba dang rit namar dei ma u uba pyndap pynbiang ïa ka jingdonkam ka ïing ‘bad ka dei ïa ki BSF ban siew bai lut ksan sha ka ïing une u rangbah,’ u la ong.
Shuh shuh u la ong ba ha ka jingshisha ka kam ki BSF ka long ban ïada ïa ki khappud na ka jingwan rung kyrthep ki briew na sha bar ri, hynrei kane ka jingsiat ïap ki BSF ha ka jaka kaba jngai haduh 9 KM na khappud ka pynpaw ba kine ki BSF ki la kheiñ sting ïa la ka jong ka kam da kaba phet na ka jaka ba dei ban ap na bynta ban leit wad kyiad bad leit sha ki shnong ki thaw ban pyntieng pynsyier ïa ki paidbah kumba ju mih ka jingkynnoh na ka por sha ka por.
Hynrei lyngba kane ka jingjia ka pyni ba ïa ki BSF la lap tyngkreiñ ba ki la ieh ïa la ka jong ka kam nalor ba ki la pyndonkam bakla ban siat ïap ïa ki briew kaba long ka jingleh kaba be-aiñ ‘namar ha ka jingshisha ki dei ban siat sha suiñ ne tang na ka tyre ka kali ym ban siat ïap,’ u la ong.

Leave A Reply

Your email address will not be published.