Shillong, Ïaiong 10 : Ka Meghalaya Football Association (MFA) ka la pynbna ba kna naduh ka 05tarik u Jymmang mynta u snem kan sa sdang biang ïa ka Meghalaya State League (MSL) ïa kaba la pynsangeh noh ha ki snem ba la dep na ka daw ka jingwan syllad khlam COVID.
Haba pyntip ïa kane u Tournament Director jongka MSL Bah Wanshan Kharkrang u la ïathuh ba ba ka lahduh ha kane ka lympung kan ïoh ban khur ïa ka song pisa kaba haduh 5lak tyngka, nangta kaba wan ba ar pat kan khur ïa ka song pisa kaba 3lak tyngka.
La pyntip ruh ba ïa katei ka lympung ïalehkai kaba heh tam ha ka jylla yn pynlong ha baroh saw tylli ki jaka jong ka rilum Khasi, Jaintia bad Garo, kata ha Shillong, Tura, Mawkyrwat bad ruh ha Jowai. Ïa ka jingïakhun kaba khatduh lane ka final la pynbeit ba kan long beit ha Shillong
Katkum ka jingong jong u, ïa kane ka lympung ïalehkai yn sdang da ka jingïakhun hapdeng ka Rangdajied United FC pyrshah ïa ka Hynñiew Wasa FC kaba la buh ban long ha Jowai.
Ha kane ka lympung kin don haduh 25tylli ki kynhun kiban aireng, kata tang ïa ki klob kiba la dep ban pynlong dkhot bad ka Meghalaya Football Association.
