Watla jop ïa ka SAFF Championship, hiar ka India ar kyrdan ha ka thup jong ka FIFA

Ha ka sien kaba lai lynter rah ka India ïa ka nam lahduh

0

DHAKA, Naiwieng 18: Ka kynhun ïalehkai phutbol jong ka ri India ka la pynurlong ïa ka jingangnud ban rah lai sien lynter ïa ka nam lahduh jong ka SAFF Championship da kaba pynliem noh ïa ka Pakistan ha ka phainal.
Kane kadei ka sien ba nyngkong ba ka India ka la lah ban jop lai sien lynter ïa ka nam lahduh ha kane ka lympung.
Ka kol jong u Sandip Mandi ha ka minit kaba 88 ka la pyndep ïa ka jingwanphai jong ka kynhun sha ka jingjop da 2-1 pyrshah ïa ka Pakistan kaba la shah pynduna sha ka 10 ngut ha ka jingïakhun kaba la long ha National Stadium, Dhaka ha ka sngi Ba-ar (17 tarik Naiwieng, 2026), bad rah syndon ïa ka nam lahduh ha ka rekod kaba 10 sien.
Ha kaba nyngkong, ka kynhun jong u Naushad Moosa ka la shah ñion khlem sangeh ha ka Pakistan kaba la pynïakhlad ïa ka jingïakhaid ha ka minit pynjlan shuwa ban jam sha ka por shongthait lyngba ka kol jong u Alamgir Ghazi (45+1’).
Hynrei ka jingshah beh noh jong u Junaid Shah hadien ka jingbishar bñiah jong ka VAR ka la long ka jingmyntoi na ka bynta ka India, kaba la pynïakhaid lyngba u Suhail Ahmad Bhat (60’) bad hadien nangta u Mandi u la thep ïa ka kol kaba kongsan ban khur ïa ka jingjop.
Nalor ka khusnam lahduh ka India ka la khur ïa baroh lai tylli ki khusnam shimet jong ki rangïalehkai, ha kaba u Suhail Ahmad Bhat u la pynkut da ar tylli ki khusnam ba kynthup ïa ka Most Valuable Player bad Top Goalscorer (4 kol), katba u rangap kol ka kynhun, u Arsh Anwer Shaikh ïa ka nam Best Goalkeeper.
Hynrei wat hadpeng kane ka jingjop ka India ka la hiar ar kyrdan ha ka thup jong ka FIFA Ranking, bad ka don mynta ha ka kyrdan ba 140.
Ka India, kaba la rung khatduh ha ka thup kyrdan ba shispah lane Top 100 jong ka FIFA ha u snem 2023, ka la hiar bha naduh katei ka por, hadien ba ki la shah weng noh na ka jingïakhun ïaknieh rung sha ka FIFA World Cup 2026 bad ka AFC Asian Cup 2027.
Ki nongkyrshan ki la sah ha ka lyngngoh ban tip ba watla ka la kynhun ka lah ban ïada ïa ka nam lahduh jong ka ha ka SAFF Championship, hynrei ka la duh pynban ïa ki poiñ ha ka jaka ban kamai ïa ki.
Ka India ka la ïalehkai saw sien ha ka SAFF Championship 2026, da kaba pynliem ïa ka Pakistan da 3-2 kol ha ka jingïalehkai group-stage ba nyngkong shuwa ban jop pyrshah ïa ka Maldives da 1-0. Nangta ka la pynliem ïa ka Bhutan da 2-1 ban poi sha ka final, bad rah ïa ka nam lahduh da ka jingjop pyrshah ïa ka Pakistan da 2-1.
Hynrei ym don kawei ruh na kine ki jingïalehkai kaba lah ban kyntiew ïa ki point ha ka thup kyrdan. Ka prokram ïakhun jong ka FIFA na ka bynta u bnai Naiwieng 2026 ka ailad ïa ki ri ban ïalehkai ar tylli ki jingïalehkai hapdeng ka 09 bad ka 17 tarik u Naiwieng. Ha katei ka por, ka India ka la kheiñ ïa ki ar tylli ki jingïalehkai paralok pyrshah ïa ka New Zealand kum ki jingïalehkai ba pura.
Ka India ka la mad ïa ka namrem da 0-5 ha ka jingïalehkai ba nyngkong ha Auckland shuwa ban shah pynliem biang da 0-3 ha Christchurch. Namar kata, ka kynhun jong u Khalid Jamil ka la shah khate da 6.44 poiñ. Haba bynrap ïa ki poiñ ba la duh ha ka jingshah rem pyrshah ïa ka Brazil bad ka Uruguay ha u bnai Risaw, ka India ka la duh 8.13 poiñ ha ki saw tylli ki jingïakhun ba la dep.

Leave A Reply

Your email address will not be published.