SSA Champions Cup 2026: Mad ka Sanmer bad ka Mawpdang ïa ka jingjop ba nyngkong
Shillong, Naiwieng 18: Hadien ar tylli ki nam rem, ka Sanmer SC ka la khur ïa ka jingjop kaba nyngkong ha ka lympung SSA Champions Cup 2026 hadien ba ka la pynliem noh da 5-1 ïa ka Sohryngkham SC ha ka jingïakhun jong ka Group B ba la long ha ka sngi Ba-ar ha SSA Stadium.
Ha kawei pat ka jingïakhun ha ka Group A, ka Mawpdang SC ka la pynjemkhnap ïa ka Nongkrem SC da 3-0.
Ha ka jingshisha ha ka jingïalehkai ba nyngkong, ka Sohryngkham ka la ïoh ban thep nyngkong lyngba u Winstar Kharpran (20’), hynrei ha ka sien kaba ar ha kane ka lympung, ka la pynlehnohei ïa ka kol lamkhmat hadien ka hat-trick jong u Maxcimilando Tariang (28’, 31’, 60’P) bad mar kawei ka kol na u Joinborlang Nongspung (40’) bad Ishar4mkhi (40’).
Ha ka jingïalehkai kaba bud, u Jonathan Kharbani (22’, 39’) bad u Donlad Diengdoh (73’) ki la thep ïa ki kol ba kongsan na ka bynta ka Mawpdang.
Ka Sanmer ka la shah rem ha ka jingïalehkai ba nyngkong jong ka da 1-0 ha ka Shillong Lajong FC bad da 2-1 ha ka Mawkhar SC – hynrei ka jingjop pyrshah ïa ka Sohryngkham ka la ïarap ïa ka klob ban khur ïa ki point ba nyngkong ha kane ka lympung. Ma ka (Sanmer) ryngkat ka Sohryngkham bad ka Sei La Sap FCC baroh ki la kamai mar 3 point, ha kaba ka Sanmer ka wan kham hakhmat namar ka don ïa ka jingïapher kol kaba kham bun (goal difference +2); bud sa ka Sohryngkham (-4) bad nangta sa ka Sei La Sap (-8).
Na ka bynta ka Nongkrem ruh, kaba dei ka lahduh ha ka First Division, ka la shah rem ha baroh ar tylli ki jingïakhun ba nyngkong hynrei ka la pynjlan ïa kane sha ka lai sien lynter ha ka sngi Ba-ar, kaba mut ba kam don jingkyrmen shuh ban ïoh jaka ha ka semifinal na ka Group A.
Katba na ka bynta ka Mawpdang, kane kadei ka namjop kaba nyngkong bad ka la kyntiew ïa ki sha ka kyrdan ba lai ryngkat ki 4 point, bad ki dang don ha ka jingïakhun na ka bynta ka thup kyrdan ba ar lane Top 2 ban rung sha ka semi final.