Nongpoh, Lber 01: Shibynta ban rakhe ïaka sngi ki longkmie bala tip kum ka International Women’s Day, ka ophis u District Sports Officer kala rai ban pynlong da ka jingïakop tan tyllai (Tug of war) bad ka Basketball tang naka bynta ki kynthei ha Ri-Bhoi District.
Ïaka jingïalehkai tan tyllai yn pynlong haka 13 tarik Lber naduh ka por 9 baje mynstep bad ka jingïalehkai Basketball yn pynlong naduh ka 15-17 tarik Lber bad kan don ruh ka khusnam bala pynkhreh kyrpang naka bynta ka jingïalehkai tan tyllai ki nongjop kin ioh khur ïaka song pisa kaba T.5,000/- bad kiba wan ba ar kin ioh khur ïaka song pisa kaba T.3,000/- katba haka jingïalehkai Basketball ki nongjop kin ioh khur ïaka song pisa kaba T.10,000/- bad kiba wan ba ar kin ioh khur ïaka song pisa kaba T.7,000/-.
La pyntip ruh ba baroh ki nongïashim bynta ki dei ban long kiba shait ba khlaiñ bad ka tarik ba khatduh ban pynrung kyrteng kan long ha lane shuwa ka 9 tarik Lber 2023 ha ophis u District Sports Officer, Nongpoh.
Kumta la kyrpad ïa kito kiba kwah ban shim bynta ha katei ka jingïakop ba kin lei tai kyrteng bad ban shim bynta shitrhem ha katei ka lympung khnang ba katei ka jingrakhe ïaka sngi ki longkmie kan long kaba jop.
