Shillong, Lber 31: Ka Ïing dorbar thaw aiñ ka jylla ha ka dorbar mang tyngka kaba la dep ka la pynlait ïa ka pisa kaba T.80/- klur tyngka ban thied jaka shuh ban pynheh ïa ka kad liengsuiñ ha Umroi kaba don ha Ri Bhoi District.
Ka jylla Meghalaya ka don tang kane kawei ka kad lieng suiñ kaba treikam mynta, hynrei kane ka jaka ka lah ban hiar tang ki liengsuiñ kiba rit kiba lah ban ngiam tang 75 ngut ki nongleit nongwan.
Ka sorkar jylla na ka por sha ka por ka la wat ki lad ki lynti kumno ban pynheh ïa kane ka kad liengsuiñ ha kaba ki liengsuiñ kiba kham heh ki lah ban hiar ha kane ka jaka, la kumno kumno ki lieng kiba la lah ban kit haduh 141 ngut ki nongleit nongwan.
Kane ka jingpynlait pisa shuh ka ïing dorbar thaw aiñ ka jylla sa T.80/- klur tyngka ka long ba ka sorkar kan thied jaka biang ban pynheh ïa ka jaka mareh jong ka liengsuiñ ha ban hiar ka kiew ha kane ka jaka.
