Na ka bynta ka kñia ryngkaw pynkhuid ‘Law kyntang ki khun ka Seiñ Raij Tuber

Khliehriat Lber 31:Kum ka jaitbynriew Hynñiewtrep, hynñiew skum, shisha ka long kaba donkam ban pynneh pynsah pateng la pateng ïa ki matti jong ki longshwa, manshwa, kiba la pruid dak ha ngi ki long dien, kaba ka ktien ka ong ‘im ka niam im ka jaitbynriew’ sngewtynnad ban tip ba ki khun jong ka Seiñ Raij Tuber ki la nang pynkhreh shaid shaid ïa ka leh niam shad Sukra kaba yn sa pynlong ha Tuberkmaishnong, kaba ju pynlong ruh man la u snem bad ki khun jong ka Seiñ Raij Tuber hynnin ka sngi u Blei, ki la pynkhuid ïa ka Khlaw Kyntang lane ka Khloo blai kaba don ha shnong Tuber Kmaishnong, East Jaiñtia Hills District.
U Mawphor, ha kaba ïakren bad u bah Tell me true Phawa, uba dei u Assistant Secretary bad u ba bat ruh ïa ka kam kum u Secretary jong ka Art & Culture Committee Seiñ Raij Tuber, u la iathuh shibun kiei kiei kiba ïadei bad ka leh niam shad sukra, kane ka leh niam shad sukra mynta u snem kan sdang naduh ka 4 tarik mynta u bnai ïaiong bad yn pynkut ha ka 6 tarik u ïaiong 2025.
U bah T.Phawa, u la ong ba ha ka 4 tarik kan don ka kñia Ryngkaw bad kaba kum kane ka sngi ki ju khot ka Sang Sngi, ha kane ka ‘sang sngi baroh ki khun jong ka Raij Tuber kim dei satia ban leit trei leit ktah namar ka dei ka sngi ba ki shong sngi, kim dei ban rah ïa u mohkhiew, ka wait ban trei ban ktah.
Haba kren pat shaphang ka Khlaw Kyntang u bah Tell mi true Phawa u la ong “Ka Kloo blai ka dei ka khlaw kyntang bad hangne ha kloo blai naduh ki por ba mynshwa bad haduh mynta ki don ki Mukoi, kine ki Mukoi ki dei ki jaka ba kyntang ba ju pyndep ïa ki jingkñia da u Longdoh, hapoh ka Khloo blai ka don ka Mukoi jong u khlawait Tuber, u Woh Tep Kyndait, ka don ruh ka Mukoi jong u blai Ryngkaw, u blai Ryngkaw u dei u blei ba ki niam tre ki mane, ka don ruh kawei ka jaka hapoh ka Khloo Blai Tuber kaba ha ki por kiba mynshuwa ki khun ka Raij Tuber ki shong shnong bad ïa kane ka jaka la tip mynta kum ka Shnongrim (Tuber), ïa kane ka shnongrim (Tuber) ruh ngi la pynkhuid namar ha kane ka jaka ka don ka tpep, kane ka Tpep ka dei ka maw Tylleiñ kaba mut ba ha ka niam tre ïa ki briew kiba iap ki ju lum ïa ki shyieng jong ki ba iap bad buh ha ki Tpep, hapoh ka khlaw kyntang ki don ruh ki mawbynna sah nam kiba naduh hyndai, ka don ruh ka jaka kaba ka Raij Muthlong mynshwa ka ju ïa shong dorbar, ïa kane ruh ngi la pynkhuid” ong u bah Phawa.
La iathuh shuh shuh ba ha kane ka Khloo blai ne khlaw kyntang kaba don ha Tuberkmaishnong kumba ju leh man la u snem, ha kane ka 4 tarik u bnai ïaiong 2025, kin pynlong ïa ka jingkñia Ryngkaw kata ka dei ka jingkñia ïa u blei Ryngkaw, la kñia ïa une u blei ryngkaw, namar ki nongshongbri ne kita ki nongshong shnong, kaba mut ba baroh ki shnong kiba hap hapoh ka Raij Tuber bad baroh ki briew kiba shongbri, shongkhyndaw kaba mut ïa ki briew kiba shnong ha kane ka sla pyrthei kiba hap hapoh ka Raij tuber kin ïa wan lang ha katei ka 4 tarik bad kin wan ai ïa ka Khat ka Dan, kane ka Khat ka Dan ka mut ba ki wanrah ïa ki jingknia, namar ha ka por ba mane blei ki ju kren bad khana khamtam ha ka pang ka shitom ki ïa mane blei hangta bad lada ki briew ki ioh ïa ka koit ka khiah kin ai ïa kata ka Khat ka Dan kaba dei ka jingkñia kaba mut kin ai da u blang lane da u syiar kum ki jingkñia, ha katei ka sngi jong ka 4 tarik dang step phyrngap, kin ïa mih ha kaba u Longdoh ruh un mih ban leit kñia ïa kita ki jingkïia ba wanrah da ki briew kiba ki ong ka Khat ka Dan bad yn kñia ha ka Mukoi jong u blai Ryngkaw, na kata ka daw ki khun ka Raij ki pynhuid ïa ka Mukoi u Ryngkaw na ka bynta ba yn sa pyndep ïa ka kñia ka khriam kaba ha ka 4 tarik.
La ong ruh ba ha ka 5 tarik pat ki khun, ki hajar jong ka Seiñ Raij Tuber kin ïa shongthait bad kumjuh ruh ha ka 5 tarik dang step phyrngap ha ka por 2 baje mynstep kan don kawei ka kñia kaba ki ong ka kñia shad thoh ne ka kñia pynhap synbai, ïa kane ka kñia pynhap symbai kaba yn pyndep da u Longdoh bad ynda u la dep ban kñia symbai bad hangta u Longdoh un sa pynhap ïa u symbai, u phniang bad hadien kane ki khun ki hajar kin sa lah ban hiar sha ki bri ki lyngkha, ki hali, ki tor, ki jaka rep ban bet ïa u symbai bad ban sdang ïa ka rep ka riang, kumta dei na kata ka daw ba yn sa pynlong ïa kane ka leh niam shad sukra bad ïa kane ka leh niam shad sukra la pynlong man la u snem.
La iathuh bad pynshai shuh shuh da u Secretary Art & Culture Committee Seiñ Raij Tuber ba ha ka 6 tarik pat ha ka por dang step yn leh biang ïa ka kñia blai Ryngkaw hi, tangba ka jingiapher ka long ba ha ka 4 tarik ïa ka jingknia la ju pyndep ha Mukoi u Ryngkaw kaba doh hapoh ka Khlaw kyntang, ha kaba la ju knia ïa kito ki briew kiba ioh ïa ka Khrong, kane ka Khrong ka mut ïa kito ki briew kiba la pyniasoh pura ne pynkyntang sha ka niam tre, namar wat lada long niam tre ruh kin dang don ki bym pat pynkyntang pura sha ka niam, kumta kin don ki dkhot jong ka niam tre ki ban ioh long kita ki ban ioh ïa ka Khrong ka Tri ha katei ka 4 tarik ha kaba yn kñia kyrpang ha ka Mukoi jong u blai Ryngkaw bad ïa kito ki briew kiba dei hi ki niam tre ki bym pat ioh ïa ka Khrong ka Tri ïa ki pat yn kñia ha ka 6 tarik bad ïa kane pat yn pyndep ïa ka jingleh niam shabar jong ka Khloo blai, ka jaka kaba doh hajan ka khlaw kyntang hi ha Tuber Kmaishnong.