Shillong, Jylliew 6 : U Myntri ka Ministry of Health & Family Welfare ka Sorkar Pdeng u JP Nadda ula ïashim bynta ha ka prokram thungdieng ha Shillong Golf Club ha ka Sngi Thohdieng, kaba pyni ïa ka jingrakhe ka BJP ïa ka World Environment Day ha ka Ri baroh kawei.
ïa kane ka prokram la pynlong hapoh ka campaign u Myntri Rangbah Duh ‘One Tree One Mother”, kaba kyntu ïa ki nongshong shnong ban thung ïa ki synbai dieng kum ka burom ïa la ki jong ki Kmie ban kyntiew ïa ka jingpynneh pynsah ïa ka mariang.
U Nadda ula ong ba ïa kane ka campaign la sdang ha u snem 2024 bad la nang pynheh shuh shuh ïa ka, ha kaba da ki lak ngut ki nongtrei ka BJP ki la ïashim bynta ha kylleng ka Ri.
Ula pynpaw ba kane ka campaign ka pynïadei ïa ka jingsumar naduh ka dohnud ïa la ki Kmie bad ka bynta jong ka mariang ban ai jingim.
U MLA ka Pynthorumkhrah bad nongïalam ka BJP u Bah A.L.Hek uba la ïadonlang, ula ong ba ka jingïatreilang bad ka jingthung ïa ki dieng ki dei ki bynta ba kongsan ban ïada ïa ka mariang.
Ula bynrap ba ka jingïada ïa ki khlaw, ki tyllong um bad ki jingthaw ba im ki long kiba kongsan na ka bynta ka jinglong ryntih ka mariang bad ki pateng ban wan.
