Sakhilang ki nongïalam barim ïa ka jingbam smai ki 32 ngut ki dkhot ba thymmai ka CEC jong ka KSU

Shillong, Jylliew 6: U Chairman jong ka North Eastern Student Organisation u Bah Samuel B Jyrwa uba dei ruh u President barim jong ka seng ki samla pule ka Khasi Student Union, mynta ka sngi u la pynbam smai ïa ki dkhot ba thymmai jong ka Central Executive Committee jong ka KSU na ka bynta ka samoi trei kam 2026 haduh 2029.
Ïa kane ka jingbam smai la pynlong ha u Soso Tham Auditoriun, ha ka jingsakhi lang jong ki nongialam bad ki dkhot barim jong ka KSU khlem da jer lyrteng ïani ïano ruh bad kumjuh ruh ïa ki dkhot kiba mynta ruh kumjuh jong ka KSU.
Ïa kane ka jingpynbam bmai la phiah ha ki lai bynta, kawei ka kynhun ba la ïalam da u General Secretary u samla Reuben Najiar, kawei pat da u Vice President u samla Pynkmenlang Sanmiet bad kawei pat da u samla Raymond Kharjana uba dei u President ba thymmai jong ka KSU seng kmie.
U Samla Raymond Kharjana u la kylla long uPresident ba 10 jong ka seng ki samla pule Khasi Student Union, bad baroh ki dkhot jong ka Central Executive Committee (CEC) jong ka KSU ki don 32 ngut.
Na ka liang jong ka CEC kaba rim jong ka KSU ha shwa ban pynbam smai ïa ki dkhot ba thymmai jong ka CEC kala ai ïa ka kaiphod trei kam jong ka ha kine ki lai snem kiba leit.
U Bah Samuel B Jyrwa u la shim ïa ka bynta ba kongsan kata ka long ban pynbam smai ïa baroh 32 ngut ki dkhot ba thymmai jong ka CEC ki ban shakri na ka bynta ka samoi trei kam 2026 haduh 2029.
Ha kane ka sngi la pynkupburom ruh ïa ki nongïalam kiba rim ba kynthup ïa u Bah Sonstar Nongkhlaw uba dei u Assistant Finance Seretary barim bad u Bah Biangbor Paliar uba dei u Vice President barim bad ïa kine la pynkup burom da u samla Pynkmenlang Sanmiet uba dei u Vice President ba thymmai jong ka KSU.
Hadien kane la pynkup burom ruh ïa u Bah Manly Nongpluh uba dei u Finance Secretary barim bad u samla Donald V Thabah uba dei u General Secretary barim bad ïa kine la pynkup burom da u Samla Reuben Najiar uba dei u General Secretary ba thymmai ka KSU.
Na ka liang u samla Raymond Kharjana uba dei u President ba mynta jong ka KSU u la pynkup burom ïa u Bah Barikular Nongsiej uba dei u Executive Member barim bad u Bah Lambokstarwell Marngar uba dei u President barim ka KSU.
Kala don ruh ka jingai burom ïa ki nongialam ba la shongthait na ka North Khasi Hills District, Raid Nongtung Circle, Laitumkhrah Unit bad na Jowai Unit.
La nang pynphuh pynphieng bad pynshongkun ïa kane ka jingialang da ki sur jingrwai na ki nongrwai bad kumjuh ruh ki kynhun rwai bapher bapher.