Shillong, Nailur 01: Ka Meghalaya Football Association kan pynlong ïa ki jingpyrshang (trials) ban jied ïa ka kynhun ïalehkai Sub-Junior Boys ki ban mihkhmat ïa ka Meghalaya ha ka lympung National Football Championship (NFC).
Kumta ha kaba ïadei bad kane, la kyrpad ïa baroh ki synjuk jong ki district kiba la pynïasoh bad ka MFA, ba kin jied bad phah ïa ki rangïalehkai ba kynsai tam jong ki na ka bynta kane ka trial, ka ban long ha ka 05 tarik Nailur ha MFA Ground, Polo. Ki nongïalehkai ki dei ban wanpoi ha ka por 11 baje mynstep ha katei ka sngi.
Ki khynnah kiba lah ban shim bynta ha kane ka trial kidei kiba la kha hapdeng ka 01 tarik Kyllalyngkot 2013 haduh ka 31 tarik Nohprah 2014. Ka long kaba donkam ïa baroh ki nongïalehkai ban wanrah ïa ka syrnot kha, ka Aadhaar card, ka CRS ID bad ka DigiLocker kaba treikam sha ki trial.
Ki synjuk ki dei ban phah ïa ki kyrteng jong ki nongïalehkai ba la jied jong ki sha ka MFA ha lane shuwa ka 03 tarik Nailur.
