Shillong, Nailur 01: Ka Shillong Lajong ka la pynkhihjar ha baroh ar tylli ki kylla ban pynliem ïa ka Meghalaya Police da 2-0 ha ka Shillong Premier League 2026 hynne ka sngi Ba-ar ha madan First Ground-SSA Stadium.
U Ricky Kharkongor (39’) bad u Lalmuansanga (54’) ki dei ki nongthep kol ha kane ka jingïalehkai kaba la pynjlan ïa ka jingïakhun khlem shah rem jong ka Lajong mynta ka samoi sha ki saw tylli ki jingïalehkai katba ka la pynlong ïa ka MLP ban mad ïa ka nam rem ba nyngkong.
Shuwa kane ka jingïakhun, baroh arliang ki la sdang ha kajuh ka rukom ïa kane ka samoi, da kaba jop arsien bad ïakhaid shi sien.
Haba phai sha ka jingïakhun, ki 10 minit ba nyngkong ki la sakhi ïa katto katne ki jingpyrshang na u Freddy Jyrwa bad u Lalmuansanga kiba la sepei, nangta ka freekick jong u Galbraith Laitmon kaba la lait sharud, shuwa ba u rangap kol ka MLP u Eveningstar Bareh un donkam ban leh eiei ban khanglad ïa u Lalmuansanga sa shisien. Ka Lajong ka la ïoh ba kan lamkhmat tang hadien ar minit hadien ba u Lalmuansanga u la kynriah sha ka liang kadiang, ha kaba u la ïoh ban pashat ïa ka bol na ka bynta u Ricky ban thep ïa ka kol ba nyngkong. U Ricky u la mynsaw noh ïalade ha ka por ba thep ïa katei ka kol bad la pynshong noh ïa u tang ha ka kylla step.
Ha baroh kawei ka kylla step ka MLP ka la ïoh tang kawei ka kabu ksiar ba la pyrshang da u Aldrin Ramsiej.
Ka MLP ka la ïoh ïa ka kabu kaba paka ha kaba sdang jong ka kylla miet na ka free-kick hajan kol, hynrei ka jingpyrshang jong u Bikram Chettri ka la shu sepei bad lait sharud.
Ka kol kaba ar jong ka Lajong ka la urlong tang hadien katto katne por namar ka jingbakla pashat bol jong ka MLP kaba la plie lad ïa u Lalmuansanga ban ïaid lait na u Eveningstar shuwa ban phah ïa ka bol sha shiliang u laiñ.
U Lalmuansanga u la dei ban ïoh la kumno kumno ar kol hadien hynrei u la pynsepei ïa ki kabu ba u la ïoh. Watla kata ruh, ka Lajong ka la ïalehkai pyndep khlem da shah thep ban khur pura ïa ki lai point.
Da kane ka jingjop ka SLFC ka dei ka kynhun kaba nyngkong eh ban kynjoh sha ka 10 point bad ka bat ïa ka kyrdan ba ha khlieh duh jong ka miej. Katba ka MLP pat ka la hiar na ka kyrdan ba-ar sha ka kyrdan kaba saw bad ka dang ïaineh da ki 7 point.
Kin don ar tylli ki jingïakhun ha kane ka sngi Balang. Ka jingïakhun kaba nyngkong kan long ha ka por 1baje mynsngi hapdeng ka Laitkor pyrshah ïa ka Langsning; kane ka jingïalehkai la pynkynriah noh namar ka jingjur jong u pyrthat ha ka 28 tarik u Nailar. Nangta yn bud sa ka jingïakhun kaba itynnad hapdeng ka Nongkseh pyrshah ïa ka Mawlai ha ka por 5 baje janmiet.
