Shillong, Nailur 01: Ka Meghalaya ka la pynliem ïa ka Tamil Nadu da 2-1 kol ha ka jingïalehkai ba nyngkong jong ka Group C ha ka Junior Boys National Football Championship 2026-27 (Tier 1) na ka bynta ka Dr BC Roy Trophy ha Bengaluru hynne ka sngi Ba-ar.
Ka Meghalaya ka la ïoh ban lamkhmat dang kloi tang mar ïa sdang lyngba ka kol jong u Adriel B Nongbet ha ka minit kaba 4. Nangta ha ki minit pynjlan shuwa ban jam sha ka por shongthait u Aiborlang Mulieh (45’+3) u la pynjlan ar shah ïa ka kol lamkhmat na ka bynta ka Meghalaya.
Ka Tamil Nadu ka la ïohlad ban pynphai shi kol lyngba u Rohin G (73′) ha ka kylla miet hynrei ka Meghalaya ka la lah ba kan ïada ïa ka jinglamkhmat jong ka ban khur ïa ka jingjop da 2-1 kol.
Ka Meghalaya kan ïakhun biang ha ka sngi Palei pyrshah ïa ka Maharashtra ha ka por 11 baje mynstep. Ka Maharashtra ka la shah rem da 2-0 kol pyrshah ïa ka Mizoram ha ka jingïalehkai kaba kham hashwa hynne ka sngi. Tang ka kynhun kaba pyndep ha khlieh duh na kawei pa kawei ka Group kan ïohrung sha ka semifinal.
Ka kynhun ki nongïalehkai jong ka Meghalaya kiba la mih madan ki long:
Alvin Kharbani (GK), Shanborlang Khongjee, Franky Kharkrang, Samuel Malieh, Wallambok Thongni, Pyrkhatlang Marbaniang (sub Seibok Lyngdoh 61′), Andrew Kharsati (sub Mallenga N Sangma 90’+2), Aibannangkhraw Kharumnuid, Adriel B Nongbet (sub Kishan Wahlang 72′), Aiborlang Mulieh (sub Sannaky Nongsiej 61′), Habankhlur Lyngdoh Mawnai
