Pynbna u Khalid Jamil ïa ka kynhun ban ïakhun ïa ka Panama, Brazil, Uruguay
Paw kyrteng u Ricky Shabong ha ka thup ki 26 ngut.
NEW DELHI, Nailur 01: U coach jong ka kynhun ïalehkai phutbol ba la rangbah jong ka ri India, u Khalid Jamil, ha ka sngi Nyngkong, 31 tarik Nailar 2026 u la pynbna ïa ka thup kyrteng kaba don 26 ngut ki nongïalehkai, ba kynthup ruh ïa u Ricky Shabong, rangïalehkai pdeng madan jong ka jylla Meghalaya.
Kane ka kynhun kan long na ka bynta ki jingïalehkai paralok jong ka FIFA International Match Window ha u bnai Nailur bad Risaw.
Ka India kan ïakhun lai tylli ki jingïalehkai paralok pyrshah ïa ki kynhun ba kham khlaiñbor, da kaba aireng pyrshah ïa ka Panama ha ka 26 tarik u Nailur ha Bengaluru shuwa ba kan ïakhun pyrshah ïa ka Brazil (kaba la bat san sien ïa ka nam lahduh ha ka pyrthei) ha ka 03 tarik u Risaw bad ka Uruguay (kaba la jop arsien ïa ka nam lahduh ha ka pyrthei) ha ka 06 tarik u Risaw, baroh ar tylli kin long ha Kolkata.
Kine ki lai tylli ki jingïalehkai kin ai ïa ka India ïa ka lad ban tynjuh ïalade pyrshah ïa ki kynhun kiba la ïalehkai ha ka World Cup, ha kaba baroh lai tylli ki ri ki la ïashim bynta ha ka FIFA World Cup mynta u snem 2026 ha USA, Mexico bad Canada.
Ka kynhun jong u Jamil kan sdang ïa ka jingpynkhreh jong ka ha ka 14 tarik u Nailur ha Bengaluru. Hadien ka jingïakhun pyrshah ïa ka Panama, ka India kan leit sha Kolkata ha ka 28 tarik u Nailur na ka bynta ki ar tylli ki jingïakhun ba dang sah.
Nalor ki 26 ngut, la jied ruh saw ngut ki nongïalehkai ba la pynap lypa — u nongap kol u Hrithik Tiwari, ar ngut ki rangap-dien u Chinglensana Singh Konsham bad u Roshan Singh Naorem, bad u nongïalehkai pdeng u Suresh Singh Wangjam — bad ki lah ban shah khot ha ka kynhun lada donkam.
Ka thup kyrteng ki 26 ngut ki nongïalehkai jong ka ri India na ka bynta ki jingïalehkai paralok jong ka FIFA ha u bnai Nailur bad Risaw:
Rangap-kol: Albino Gomes, Gurpreet Singh Sandhu, Prabhsukhan Singh Gill, Som Kumar.
Rangap-dien: Abhishek Singh Tekcham, Akash Mishra, Anwar Ali, Bijoy Varghese, Hmingthanmawia Ralte, Jay Gupta, Pramveer, Ricky Meetei Haobam.
Rangïalehkai-pdeng Madan: Anirudh Thapa, Ashique Kuruniyan, Farukh Choudhary, Lalengmawia Ralte, Macarton Nickson, Mohammed Sanan, Ricky Shabong, Sahal Abdul Samad.
Rangïalehkai ba Shakhmat: Edmund Lalrindika, Irfan Yadwad, Manvir Singh, Rahim Ali, Ryan Williams, Vikram Partap Singh.
Head coach: Khalid Jamil
Ka prokram jingïalehkai paralok jong ka India:
26 tarik Nailur: India pyrshah ïa ka Panama (Jaka: Sree Kanteerava Stadium, Bengaluru)
03 tarik Risaw: India pyrshah ïa ka Brazil (Jaka: Vivekananda Yuba Bharati Krirangan, Kolkata)
06 tarik Risaw: India pyrshah ïa ka Uruguay (Jaka: Vivekananda Yuba Bharati Krirangan, Kolkata)