Shillong, Rymphang 01 : U Symbud Myntri Rangbah ba peit ïa ka tnad PWD (Roads) Bah Prestone Tynsong u la ong ba ka jingkhang ban ïaid kali ha Jingkieng Umïam kan dei tang ha ka por ba bujli ïa ki bearing hapoh ka jingkieng.
Katkum ka jingong jong u, ka jingbujli ne kylliang ïa kitei ki bearing kan shim por tang kumba 3 kynta haduh 7 kynta bad hadien kane ki kali rit ki lah ban ïaid biang kumba ju long.
“Ka jingkhang ban ïaid kali nalor ka jingkieng Umïam kan dei beit tang ha kato ka por ba buh bad bujli ïa ki bearing bad kane kan shimpor kumba 3 kynta haduh 7 kynta. Halor kane, ka la don ruh ka jingpynbeit hapdeng ka tnad PWD bad ka tnad Bording ba yn hap ban khang ïa ki kali ban ïaid ha katei ka por ba ki Technical Team ki dang treikam,” ong u Symbud Myntri Rangbah.
Ha kajuh ka por, u Bah Prestone u la pynshai ruh ba ka jingkhang ban ïaid na kane ka jingkieng kadei tang ïa ki kali heh. Shuh shuh u ong ruh ba ka tnad kan sa pyntip ïa ka por naduh katno baje haduh katno baje kin khang ban ïaid na katei ka lynti khnang ba ki paidbah kin tip lypa bad ba kin leit noh na kawei pat ka jaka.
Kumta, u la kyntu ïa ki paidbah ba katba ka jingtrei ka dang ïaid ki paidbah kiba wan sha Shillong ki hap ban ïaid lyngba ka Umroi ban mih sha Mawtawar ne wan lyngba ka Shillong Byepass ban poi sha NEIGRIHMS lane ki lah ban ïaid na Umsaw ban mih sha Mawmaram na ka bynta shipor arpor.
