Shillong, Rymphang 01 : U Lamphang ka Ïing Dorbar Thawaiñ ka jylla, u Thomas A Sangma ha ka sngi Palei u la ïathuh ba ka jingsuki palat ka rukom pyntrei ïa ka Ïing Dorbar ba thymmai ka jylla ha New Shillong ka la pynbynñiaw ïa u khamtam haba ka por ban pyndep la buh ba kan dei ha u Nailur mynta u snem.
Haba kren bad ki lad pathai khubor, u Lamphang u la pyntip ba ha ka jinghiar jurip ha kane ka sngi Palei u la kyntu ïa ki bor ba pyntrei ba kin kham pynstet ïa ka kam.
Tangba, u ïathuh ba hadien ka jingïakren la ïoh jingtip pat ba ka daw ka jingsuki ka jingïaid jong ka kam kadei namar ka jingslem jong ki tiar ban poi sha ka jylla namar bun na ki la hap ban wanrah na kiwei pat ki jylla kum na Maharashtra.
“Haduh mynta kumba mar shiteng ki tiar ki la poi. Hynrei hangne ruh ka jingeh kadei ba ki kali ba kit ïa ki tiar kim lah ban kit bun nalor ba ki hap ban ïaid kyllaiñ sawdong ban poi shaduh ka jaka,” u la ong.
U Lamphang u la pyntip ruh ba ka jingpyntrei mynta kaba dang kham sah bun kadei sa tang ka Main Hall kaban don ïa ka Assembly Hall kaba la kular ba yn pyndep noh ha u Lber mynta u snem.
Haba jubab halor ka jingkylli, u Lamphang u la ong ba ka jingai por ban pyndep kaba la buh ha u Nailur mynta u snem kan neh khamtam haba ka jingpyndait ïa u dome ba la shna kham sting la kular ban pyndep noh ha u Lber mynta u snem hi.
La pyntip ruh ba ïa ki lyngkhot lyngkhai na jinghap u dome la dep ban pynkhuid lut.
“Ngan buddien ïa kane bad pyntikna ba ka kam kan ym slem ban pyndep,” u la bynrap biang.
