Shillong, Rymphang, 01: Ki shipai BSF kiba pahara ha khappud ki la ïohkem ïa ki arngut ki nongdie kyiad bad ïoh kurup ruh 356 bilor ka kyiad kaba la thmu ban khaii tuh sha Bangladesh.
Ha u kyrwoh, ki BSF ki la pyntip ba ha ka sngi Balang hadien ba ki la ïoh jingtip bathikna ki la pynlong ïa ka jingpynap shrip bad ki la ïohbat ïa kawei ka kali bad ha ka jingtalasi la lap ba la kit da ka kyiad bad kumta ki la kem noh ïa u nongñiah bad ïa u nongbud jong ka kali kiba dei ki nong India bad la kurup noh ïa ka kyiad kaba don hapoh kali.
Ki BSF ki la ïathuh, ba ïa ka kyiad la thmu ban khaii be-aiñ sha ri Bangladesh lyngba ka thaiñ khappud kaba don ha West Jaiñtia Hills District.
Ïa kiba la shah kem ryngkat bad ka kyiad kaba la kurup la aiti noh sha ka ophis Custom kaba don ha Dawki na ka bynta ban leh ïa kaba donkam.
