Shillong, Rymphang, 01: Ka Hynñiewtrep Border Disputed Redressal Forum (HBDRF) ha ka sngi Palei ka la dawa ïa u Myntri Rangbah ka Jylla u Conrad Kongkal Sangma ba um dei satia ban soi ïa ka Memorandum of Understanding (MoU) bad ka Assam lymda ka Sorkar Assam kam pynphai biang ïa ka Block-I kaba kynthup ïa ki phew tylli ki shnong kiba hap hapoh ka Labang Nongphyllut Dolloiship ha ka jingïapynbeit pud ha ka wat kaba ar.
Ha ka dorkhas ka Forum ka la pyntip ruh ba ha ka jingïalang kaba la long dang shen ka la shim ïa ka rai ban pyrshah ïa ka Notification No. TAD/ R/31/60/151 Dated 13th April 1951 ba la pynmih da ka Sorkar Assam khlem ka jingpynsngew paidbah bad khlem ka jingtip jong ki nongshong shnong jong ki shnong kiba hap hapoh ka Labang Nangphyllut Dolloiship (Block-1) bad u Dolloi jong ka Elaka Raliang, Elaka Chiliang Myntang bad ka Elakal Nongjngi.
Ïa kane ka “Notification” la pynmih bakla da ka Sorkar Assam da kaba shu phiah julor ïa ki shnong jong ka Nongphyllut Dolloiship jong ka rilum Jaiñtia (Block-1) na ka Jowai Civil Sub-Division bad pynngat sha ka United Cachar &Mikirs Hills ha ka jaka ban pynhap sha ka United Khasi &Jaititia Hills District Councils hapoh ka jylla Meghalaya, la ong ka Forum ha ka dorkhas ba la soi da u Chairman u Bah Chandame Sungoh bad ka Secretary ka Kong Purity Phawa.
“Lada ka Sorkar Assam kam mynjur ban pynphai ïa ka Block-1 sha Meghalaya u Myntri Rangbah ka Meghalaya um dei ban soi ïa kano kano ka sosukular ne ka MoU,” dawa ka HBDRF.
“Lah ban kdew ba kane ka Notification la leh bakla khnang ha ka kyrteng jong ki shnong bad ka jingdon briew,” la kynnoh ka Forum.
Ka Forum ka la pyrshah ruh ïa ka jingpynmih ïa ka Khanduli bad Psiar Sector ha ka Regional Committe na ka bynta ka West Jaiñtia Hills District.
“Ha ka jingsynshar ka Assam, ka United Khasi &Jaititia Hills ka la ïai pyrshang la bunsien ban ïoh biang ïa kane ka jaka. Haba ka Meghalaya ka la ïoh ïa ka jylla bapura (ka Block-I) ka la kylla long ka ishu ïaknieh khappud. Ka Sorkar Meghalaya naduh u snem 1972 haduh 2011 ka la pyrshang ban ïoh biang ïa ka Block-1. Hynrei kaba lyngngoh ka long ba ka Sorkar Meghalaya ka la pynmih ïa ka Khanduli bad Psiar Sector ha ka Regional Committee jong ka West Jaiñtia Hills bad shim ïa ka rai ban leit jngoh bad ban pynbeit ïa u pud u sam ha Khanduli bad ïa ka Psiar Sector katba ïa ka Block-1 yn sa pynbeit hadien,” la ong shuh shuh ka Forum.
“Ïa kane ka rai la pyrshah tyngeh da ka Forum ha ka jingïalang, namar da kane ka buit yn sa iehnoh ïa ka Block-1 sha Karbi Anglong, Assam. Kane ka dei ka buit jong ki Karbi bad ka Sorkar Assam ban ïoh ïa ka Block-1. Tang shu dep pynbeit ïa ka Psiar bad Khanduli kan long kaba jwat ban ïapynbeit ïa ka Block-I,” la kam ka Forum.
Ka Forum ka la pynpaw ruh ba ka jingïapynbeit ïa ka Block-I yn ym lah satia ban shu sngap tang na ka mon ki paidbah, namarba ka jingbuhai shnong bad ka jingkyntur pud ka long shaba palat bad ym tang ki Pnar bad ki Karbi kiba shong basah hynrei wat ki Nepali ruh ki don sha kine ki shnong. Ki Nepali kim dei ki trai ri trai muluk bad kim don ka bor ban pynpaw eiei. Hynrei kumba ka paw, ki Karbi bad ki Nepali ki don ka jingïasngewthuh jingmut ban don beit ha Assam bad tang ki Khasi-Pnar kiba kwah ban wan sha Meghalaya.
“Namar kata, ki ar tylli ki Sorkar ki dei ban peit ruh ki history bad ym ban shu ngop ha ka jingleh sorjamin,” la bynrap ka Forum.
“Ngi kyntu ïa ka Regional Committee ba kam dei ban pynkut ïa ka jingleit jurip tang ha Khanduli, Mukroh bad Psiar kiba dang dei ki jaka jong ka Meghalaya bad Hamren, Jrikyndeng na ka liang ka Assam ne ban pynlong ïa ka Joint Inspection na baroh ar tylli ki Regional Committee bad ki dei ban buddien ruh ïa ka Joint Survey Report jong ka District Councils ha u snem 1958,” ong shuh shuh ka Forum.
“Ïa ka kaiphod jong ka Regional Committees bad ka Sorkar Jylla dei ba ïathir ïatai hapoh ka Meghalaya Legislative Assembly. Kane ka mat, kam dei tang ka kam jong u Myntri Rangbah ka Assam bad Meghalaya hynrei ka dei ka mat jong ki ar tylli ki Jylla,” la dawa ka Forum.
