Ba leit jingïathoh u President ka HPC sha Punjab, slem ka jingïakren pynkynriah ïa ki Harijan

Shillong, Rymphang 01: Ka Kashari jong ki arngut ki nongbishar ba kynthup ïa u Justice W Diengdoh bad u Justice B. Bhattacharjee jong ka High Court of Meghalaya mynta ka sngi ka la shim bishar biang ïa ka mokotduma ha kaba ïadei bad ka them Ïewmawlong kaba shong da ki Harijan.
Ha kane ka sien shim bishar u Muktiar Rangbah jong ka sorkar jylla ne u Advocate General (AG) u Amit Kumar bad kiwei pat ki muktiar jong ka sorkar jylla ki la pyntip ha khmat ka Kashari ba Ka sorkar jylla ka la shong ïa ka jingïalang hapdeng jong ka bad ki nongïalam ka Harijan Panchayat Committee ha ka 7 tarik Nohprah 2023 ha kaba k sorkar ka la buh ïa ki katto katne ki jingtyrwa ne Proposal sha ka HPC bad ka sorkar ïa mynta ka ap sa tang ïa ka jubab ba ka HPC kan ai sha ka.
Shuh shuh u la pyntip ba ka sorkar ka la tyrwa ban buh biang ïa ka jingïalang bad ka HPC ha ka taiew ba ar u Kyllalyngkot mynta u snem hynrei na ka liang ka HPC kam pat shym la ai ktien satia sha ka sorkar ha kaba ïadei bad kane ka mat.
U AG u la pyntip ruh ba ha kane ka jingïalang kiba bun ki jingtyrwa kiba ka sorkar ka ai sha ka HPC ka la ïoh ïa ka jingmynjur na ki nongïalam ka HPC hynrei namar ki don katto katne pat kiba ki nongïalam ka HPC ki pan por ban rah ha ka jingïalang jong baroh kiba shong ha Them Ïewmawlong ïa ki katto katne ki mat kiba la ïakren ha ka jingïalang ba la long ha u Nohprah ym pat lah ban shim ïa ka rai kaba khatduh.
Na ka liang u Muktiar ba mihkhmat ïa ka HPC u R. Khatri u la pyntip ba ka jingbym lah jong ka HPC ban lum ïa ka jingïalang paidbah jong kiba sah ha Them Ïewmawlong ka daw ka dei namar u President ka HPC um don ha ka jylla namar u leit sha ka jingïathoh kyntiew kurim uba ha ïing jong u ha Punjab.
U la pan por ruh ia ka matalab Kashari na bynta kane ka jingïalang jong ka HPC bad kiba shong ha katei ka jaka na bynta ban ïakren ïa ki jingtyrwa ne Proposal kiba ka sorkar ka ai sha ka HPC.
Shuh shuh u la kyrpad ïa ka Kashari ban ai lad ba ïa ka jingïalang hapdeng ka sorkar bad ka HPC yn lum la kumno kumno hadien ka 15 tarik u Lber 2024 bad na ka liang ka Kashari kam shym la treh ban tuklar ïa kane ne ban buh sngi lano kin shong biang ia ka jingïalang hapdeng jong ka sorkar bad ka HPC da kaba ai lad ba kin jied hi ma ka ia ka sngi kaba na baroh ar liang mamla ki ia sngewbiang lang.
Ha kaba ïadei bad ka kaiphot kaba ka Kashari ka la pan na ka Sorkar ha kaba ïadei bad kane na ka liang u AG u la pyntip namar ba ka sorkar ka kwah ban ai ïa ka kaiphot kaba pura tad ynda ki Harijan bad ka sorkar ki poi ha ka jingïamynjur lang ne consensus na kata ka daw ka kam pat lah ban pynkhreh ha kane ka kynti ba mynta bad na ka liang ka Kashari ka bthah ba ka sorkar ka dei ban aiti ïa ka kaiphot sha ka Kashari ha ka sien shong bishar biang ïa kane ka mokotduma ha ka 26 tarik Lber 2024.