Phra sngi ka Dorbar Mang Tyngka, 21 tarik yn wanrah ïa ka Mang Tyngka

Shillong, Rymphang 01 : Ka Dorbar Mang tyngka jong ka Ïing Dorbar Thawaiñ kan long naduh ka 16tarik mynta u bnai bad kan kut pat haduh ka 27tarik kaba long baroh phra sngi.
Ïa ki sngi long Dorbar la mynjur ha ka jingïalang jong ka Business Advisory Committee kaba long ha kane ka sngi Palei kaba la pynïaid da u Lamphang ka Ïing Dorbar, Thomas A Sangma.
Ha kane ka jingïalang la donlang ruh u Symbud Myntri Rangbah ba dei peit ïa ka Parliamentary Affairs, Bah Prestone Tynsong, nangta u Nongïalam ka Liang Pyrshah Bah Ronnie V Lyngdoh bad ruh u Bah Lahkmen Rymbui.
“Kane ka Dorbar Mangtyngka ba phra sngi kan sdang naduh ka 16tarik bad kan kut haduh ka 27tarik Rymphang,” ong u Lamphang haba kren bad ki lad pathai khubor.
Na kitei ki phra sngi, u Lamphang u la pyntip ruh ba san sngi la mang na ka bynta ki kam jong ka sorkar (government business) bad lai sngi pat na ka bynta ki dkhot (private member’s business).
Ka Dorbar kan sdang da ka jingkren lamphang u Lat ha ka sngi sdang bad ka jingwanrah ïa ka mangtyngka da u Myntri Rangbah pat kan long ha ka 21tarik u Rymphang.
U Lamphang u la ïathuh ruh ba kadei hadien bun bun snem ba ka Ïing Dorbar kan ïoh ban pynlong haduh phra sngi ka Dorbar. Shwa kane u la ïathuh ruh ba namar ka elekshon MP kan sa long shen mynta u snem, kumta ban ïoh wanrah ïa ka mangtyngka kaba pura ki la pynlong noh kham kloi ïa ka dorbar.
Ha kaba ïadei bad kane ka dorbar mangtyngka mynta u snem, kumba ju long ka rukom ka ju sdang da ka jingkren lamphang u Lat ne ka Governor’s Address. Ha u snem baladp ka dorbar ka la thnam namar ka jingpyrshah ki MLA ka VPP ïa ka jingkren lamphrang u Lat da ka Hindi, ha kaba ki la phet jyndat ruh na ïingdorbar bad khlerm sngap ruh ïa ka jingkren jong u. Haba la kylli ïa kane ka kam na u Lamphang, u la ong ba ka Assembly kam lah ban khang ïa u Lat ban kren da ka Hindi namar ka kyndon ka shah. Hynrei u la ong ba ïa ka jingkren jong u yn pynkylla sha ki ktien ban ïasngewthuh lang bad yn sam lypa ruh sha baroh ki dkhot ka ïingdorbar.
Ki paidbah haba ki la tip ba ka dorbar mang tyngka kan sdang ha ka 16 tarik, bun ki la sdang ban kylli, kaei kaba ki MLA ka VPP kin leh lada u Lat u kren biang da ka Hindi. Na ka liang ki MLA ka VPP kim pat shym la pynpaw eiei halor kane.