Shillong, Rymphang 02: Ki ar tylli ki jingïakhun jong ka lympung Shillong Cricket League 2nd division kiba la long hynne ka sngi ha madan Urkaliar ki la jam sha kaba kut ha kaba ka Nongpdeng CC bad ka Metallica CC ki la khur ïa ka jingjop.
Ka jingïakhun kaba nyngkong ka la long hapdeng ka Nongpdeng CC kaba aireng pyrshah ïa ka Slog Warriors. Bad ïa ka toss la jop da ka Slog Warriors kaba la jied ban bol nyngkong.
Haba shimti ïa ka pali tied nyngkong, ka Nongpdeng CC ka la buh ïa ka thong da 172 ron bad pyndep haduh kaba kut jong ka 20 over, shah pynhap 8 ngut.
Ki nontied kiba la ïoh ban kamai bun ron ïa ka kynhun ki long u Teiborlang Dhar u ba la tied 50 ron naki 25 bol, katba na ka liang jong u Maitshaphrang Khongjee u la tied 45 ron naki 25 bol.
Napdeng ki rangkawangbol kiba la lehkaibha ki long u Manish Prasad (4 over: shah tied 39 ron: khur 3 wicket) bad u Roshan Singh (4 over: shah tied 25 ron: khur 2wicket).
Haba pyrshang ban beh ïa ka thong ka Slog Warriors ka la shah pynhap noh baroh ki wicket da tang 145 ron. U Roshan Singh u la tied 39 ron naki 20 bol katba u Manish Prasad u la tied 25 ron naki 15 bol.
Ki rangkawangbol kiba la seisoh na ka Nongpdeng ki long u Nerrykupar Dakhar (4 over: shah tied 19 ron: khur 2 wicket) kaba la ïarap ïa ka Nongpdeng CC ban jop da 27 ron. ïa ka nam Player off the match la khur da u Maitshaphrang Khongjee jong ka Nongpdeng u ba la tied 45 ron naki 25 bol.
Haba phai pat sha ka jingïakhun kaba ar hapdeng ka Occult pyrshah ïa ka Metalica CC, ïa ka toss la jop da ka Metalica kaba la jied ban bol nyngkong.
Na ka liang jong ka Occult ka la tied pyndep ïa ka 20 over hynrei ïohlad ban kamai tang 129 ron, hap 8 ngut. U Pynbhalang Kharsati u la kamai 23 ron naki 31 bol, katba u Damanbha Roini u la tied 22 ron naki 10 bol.
Napdeng ki rangkawangbol ka liang pyrshah kiba la kham seisoh ki long u Rahul Barua (3 over: shah tied 29 ron: khur 2 wicket) bad u Imran Ali (4 over: shah tied 9 ron bad khur 1 wicket).
Ka la shimpor tang 19.4 over ïa ka Metallica CC ban tied 130 ron, shah pynhap 8 wicket. U Sajan Maghaiya u la tied 30 ron naki 36 bol, katba u Dipayan Nandi u la khyrwit 31 ron naki 25 bol ban ïarap ïa ka kynhun ban jop da 2 wicket bad khur syndon ïa ka nam Player of the match.
