Shillong, Rymphang 02: U Akash Kumar Choudhary u la khur haduh saw wicket ha ka sngi sdang ka jingïalehkai lympung Ranji Trophy plate group hapdeng ka Meghalaya pyrshah ïa ka Sikkim kaba ïakhun hala ïing, ha Rangpo.
Ka jingïakhun ka la sdang ha kaba ka Meghalaya ka la lah ban tehlakam tad ynda ki rangïalehkai ba mih hadien jong ka Sikkim ki la ïakhun dohïap bad pyndep ruh ïa ka sngi nyngkong da 238/7 naki 78 over.
Ka Sikkim ka la jop ïa ka toss bad ka la jied ban tied nyngkong, hynrei ka la shah pynduna sha ka 63 ron shah pynhap haduh 5 ngut shuwa ba u Palzor (79) bad u Saurav Kumar Prasad (36) kin kyntiew 77 ron ïa ka kynhun shuwa ban hap u wicket ba hynriew. Nangta u Ankur u la shimti ha ka jaka u Prasad hadien ba u la shah pynhap, bad na ka liang jong u Ankur u la ïoh ban tied 58 (not out), bad lah ban kyntiew 65 ryngkat bad u Palzor shuwa ban hap u wicket ba hynñiew.
Napdeng ki rangkawangbol ka Meghalaya, u Akash u la ïoh ban weng ïa arngut ki rangtied ba kynsai ka liang pyrshah kynthup ruh ïa arngut kiba mih ryngkat u Palzor & Prasad ban pyndep ïa ka sngi ïakhun ba nyngkong da 4/46 naki 23 over. Katba na ka liang jong u Swarajeet Das u la ïoh ban khur 2/38 naki 13 over, u Aryan Borah u la khur 1/82 naki 21 over.
Ka Meghalaya kan khmihlynti ban pynhap ïa baroh lai wicket kiba dang sah mynta ka sngi bad ban nym ailad ïa ka Sikkim ban dang kyntiew shuh shuh ïa ka ron.
